မဇ္စျိမ။ ။စစ်ကိုင်းတိုင်း၊ မုံရွာမြို့ရှိ လဝကရုံးတွင်တပ်စွဲထားသော စစ်ကောင်စီတပ်ကို လက်နက်ကြီးများ ဖြင့်ပစ်ခတ်ခဲ့ရာ သုံးဦးသေဆုံးသွားကြောင်း Golden Eagle Force – Monywa -V2 က ထုတ်ပြန်ထား သည်။

ဖေဖော်ဝါရီလ ၂၇ ရက်နေ့ ညနေ ၃ နာရီ ကျော်တွင် လဝကရုံးအား ၄၀ မမ လက်နက်ကြီးများဖြင့် ပစ်ခတ်တိုက်ခိုက်ခဲ့ခြင်းဖြစ်ကြောင်း ဆိုသည်။

“အဲဒီ စစ်ကောင်စီတပ်ထဲမှာ ညနေဆိုရင် Tik Tok ဆော့တဲ့နှစ်ကောင်ရှိတယ်။ အခုသေတာ အဲဒီ နှစ် ယောက်ရယ်၊ တခြားတယောက်ရယ်ဆိုတာကို ကျနော်တို့ရဲ့ဖရဲသီး (စစ်ကောင်စီသတင်းပေး) ဆီကနေ ပြန်သိရတယ်” ဟု Golden Eagle Force – Monywa -V2 အဖွဲ့ခေါင်းဆောင် ဗိုလ်လင်းယုန်က ပြောသည်။

၄၀ မမ ၁၀လုံး ပစ်ခတ်ခဲ့ရာတွင် သုံးဦးသေဆုံးသွားသည့်အပြင် ဒဏ်ရာရရှိသူများလည်းရှိကြောင်း ဆို သည်။

ယင်းတိုက်ခိုက်မှုကို Golden Eagle Force – Monywa -V2 တပ်ဖွဲ့နှင့်အတူ ပုဏ္ဏက ပြောက်ကျားတပ်ဖွဲ့ ၊ People Defence Force (East Monywa) ၊ Peacock King People Defence Force – Monywa တို့ ပူးပေါင်းဆောင်ရွက်ခဲ့ခြင်းဖြစ်ကြောင်း သိရသည်။

အဆိုပါ လဝကရုံးရှိ စစ်ကောင်စီတပ်ဖွဲ့များသည် လမ်းသွားလာလာပြည်သူများကို အကြောင်းမဲ့ အကြမ်း ဖက်စစ်ဆေးခြင်း၊ အမျိုးသမီးများ ကာယိန္ဒြေပျက်ပြားစေရန် ရိသဲ့သဲ့လုပ်ခြင်း၊ အကြမ်းဖက်၍ အဓမ္မပြု ကျင့်ခြင်းများရှိကြောင်း ဗိုလ်လင်းယုန်ကဆိုသည်။

အမျိုးသမီးခြောက်ဦး အဓမ္မပြုကျင့်ခံရပြီး တစ်ဦးမှာမိမိကိုယ်ကို အဆုံးစီရင်သွားကြောင်းပြောဆိုသော် လည်း မဇ္စျိမအနေဖြင့် သီးခြားအတည်ပြုနိုင်ခြင်းမရှိသေးပေ။

ဒေသတွင်း သတင်းရေးသားဖြန့်ချိနေသည့် မုံရွာ - အမြင့်လမ်း သတင်းမှန်ပြန်ကြားရေးက အဆိုပါ လဝက ရုံးရှေ့မှသွားလာမှုဆင်ခြင်ကြရန် သတိပေးစာကို ဖေဖော်ဝါရီလ ၂၇ ရက်နေ့တွင် ထုတ်ပြန်ခဲ့သည်။

လဝကရုံးတွင် တပ်စွဲထားသောစစ်ကောင်စီတပ်သားများက ရုံးအတွင်းသို့ ခေါ်ဆောင်ကာ လိင်အကြမ်း ဖက်မှု၊ အဓမ္မပြုကျင့်မှုများရှိသောကြောင့် မလိုအပ်ဘဲ လမ်းသွားလာမှုများ ဆင်ခြင်ကြရန် ဖော်ပြသတိ ပေးထားသည်။

စာတည်း။ ။စောဖေ
စာမူတည်းဖြတ်။ ။စောဖေ