အိန္ဒိယနိုင်ငံ ၊ မီဇိုပြည်နယ်အစိုးရက စစ်ဘေးရှောင်များ အကူအညီရေး အတွက် ရူပီးငွေ ၄၁,၄၆၆,၀၀၀ အသုံးပြုထားပြီးဖြစ်ကြောင်း ပြည်ထဲရေးဝန်ကြီး Pu Lalchamliana က ယခုကျင်းပဆဲဖြစ်သော Assembly Budget Session တွင် ဖေဖော်ဝါရီလ ၁၉ ရက်နေ့၌ ပြောဆိုခဲ့သည်။
ယင်းလွှတ်တော်အစည်းအဝေးတွင် မီဇိုရမ်ပြည်နယ်အတွင်း စစ်ဘေးရှောင်များ၏ အခြေအနေနှင့်ပတ်သက်ပြီး လွှတ်တော်ကိုယ်စားလှယ်တစ်ဦး၏ မေးမြန်းမှုကို ဖြေဆိုခဲ့ခြင်းဖြစ်သည်။
မီဇိုရမ်ပြည်နယ်အစိုးရ၏ စာရင်းဇယားများအရ ၂၀၂၃ခုနှစ် ဇန်နဝါရီလ ၂၇ရက်နေ့အထိ မီဇိုရမ်ပြည်နယ်အတွင် ခိုလှုံနေကြသော စစ်ဘေးရှောင် ၃၁,၅၀၈ ဦးရှိပြီး ၎င်းတို့အနက် ၃၁,၀၅၀ဦးမှာ မြန်မာနိုင်ငံမှဖြစ်၍ ၄၅၈ဦးမှာ ဘင်္ဂလားဒေ့ရှ် နိုင်ငံမှ စစ်ဘေးရှောင်များ ဖြစ်ကြောင်း ဝန်ကြီးကဆိုသည်။
မြန်မာနိုင်မှ စစ်ဘေးရှောင်ပြည်သူများအတွက် ကူညီထောက်ပံ့ရာတွင် ရူပီး ၃၈,၄၆၆,၀၀၀ အသုံးပြုခဲ့ပြီး ဘင်္ဂလားဒေ့ရှ်မှ ခိုလှုံလာသူများအတွက် ရူပီး ၃,၀၀၀,၀၀၀ အသုံးပြုခဲ့ကြောင်း သိရသည်။
စစ်ဘေးရှောင်များအတွက် အဓိကအသုံးပြုခဲ့မှုများတွင် ယာယီစခန်းတည်ဆောက်ရေး ၊ စားနပ်ရိက္ခာ ၊ လျှပ်စစ်မီး ၊ သောက်သုံးရေ ၊ဆေးဝါးနှင့် အခြားလိုအပ်သော အရာများ ဝယ်ယူမှုတွင်အသုံးပြုခဲ့ခြင်းဖြစ်ကြောင်း ဆိုသည်။
“မီဇိုရမ်အစိုးရကလည်း ရှိတဲ့ဘတ်ဂျက်ထဲကနေ အကောင်းဆုံးဖြစ်အောင် ကူညီပေးတာပါ၊ လူဦးရေနဲ့ စာရင် ငွေကမများပေမဲ့ သူတို့ရဲ့ စိတ်စေတနာနဲ့ နေထိုင်ခွင့်ပေး ကူညီစောင့်ရှောက်တာတွေအတွက် ကျေးဇူးအထူးတင်ရပါတယ်” ဟု မြန်မာစစ်ဘေးရှောင်တစ်ဦးက ပြောသည်။
မီဇိုရမ်ပြည်နယ်တွင် အစိုးရ စာရင်းဇယားများထက် လက်တွေ့တွင် စစ်ဘေးရှောင်ဦးရေ ပိုမိုများပြားနေပြီး မြန်မာပြည်သားအချို့မှ မူးယစ်ဆေးဝါးရောင်းဝယ်မှုနှင့် ဥပဒေစည်းကမ်းများကို ချိုးဖောက်မှုများလည်း ရှိနေကြောင်း ဆိုသည်။
မီဇိုရမ်ပြည်နယ်အတွင်းရှိ စစ်ဘေးရှောင်စခန်းများတွင် နေထိုင်သူများ၌ အလုပ်အကိုင် ရှားပါးသဖြင့် အဓိက စားနပ်ရိက္ခာ အခက်အခဲများ တွေ့ကြုံရလေ့ရှိကြောင်း အဆိုပါ မြန်မာစစ်ဘေးရှောင်က ပြောသည်။
ယင်းအခက်အခဲများကို မြန်မာပြည်သား ကူညီကယ်ဆယ်ရေးအဖွဲ့များနှင့် ဒေသခံ လူမှုရေး ၊ ဘာသာရေး နှင့် ပရဟိတအဖွဲ့များက ရန်ပုံငွေများရှာဖွေပြီး ကူညီလျက်ရှိကြောင်း သိရသည်။
ဖေဖော်ဝါရီလ ၂၀ရက် ချင်းအမျိုးသားနေ့ကို မီဇိုရမ်ပြည်နယ် အိုက်ဇောလ်မြို့တွင် စစ်ဘေးရှောင်များကူညီနေသည့် မြန်မာနိုင်ငံသား အဖွဲ့အစည်း ကိုးဖွဲ့မှ ဦးစီးကျင်းပခဲ့ရာ ပြည်နယ်ဝန်ကြီးချုပ် ပူးဇိုးရမ်းထန်းငါ နှင့်အတူ ဒေသတွင်းရှိ ဩဇာကြီးမားသော လူမှုအသင်းအဖွဲ့များ တက်ရောက်ခဲ့ကြကြောင်း သိရှိရသည်။
စာတည်း။ ။ဖူးသိမ်ကျ
စာမူတည်းဖြတ်။ ။သန့်ဇော်(သန်လျင်)
