လီဗာပူးလ်အသင်းပိုင်ရှင် ဂျွန်ဟင်နရီက သူဟာ ပရီးမီးယားလိဂ်ကလပ်ကို ရောင်းချတာမဟုတ်ဘဲ ရင်းနှီးမြှုပ်နှံမှုတချို့ကို မျှော်လင့်တာပါလို့ ပြောပါတယ်။
၂၀၁၀ မှာ လီဗာပူးလ်ကို ဝယ်ယူခဲ့တဲ့ ဟင်နရီရဲ့ Fenway Sports Group (FSG) က ၎င်းဟာ အသင်းမှာ ရှယ်ယာရှင်အသစ်တွေကို ထည့်သွင်းစဉ်းစားမယ်လို့ နိုဝင်ဘာလက ပြောပါတယ်။
FSG ဥက္ကဋ္ဌ တွမ်ဝါနာက ကလပ်ရဲ့ ပိုင်ရှင်တွေဟာ ရောင်းဖို့ ရှာဖွေနေပေမယ့်လည်း သူတို့ရဲ့ ကြီးကြပ်မှုကို "အချိန်အတော်ကြာ ဆက်လက်ထိန်းသိမ်းထားနိုင်တယ်"လို့ နောက်ပိုင်းမှာ ပြောပါတယ်။
"ကျနော်တို့ LFC ကို ရောင်းနေတာလား။ မဟုတ်ပါဘူး"လို့ ဟင်နရီက Boston Sports Journal ကို ပြောခဲ့ပါတယ်။
"LFC အကြောင်း ရင်းနှီးမြုပ်နှံသူတွေနဲ့ ပြောဆိုနေသလား။ ဟုတ်ပါတယ်။ အဲဒီမှာ တစ်ခုခုဖြစ်လာမှာလား။ ကျနော် ဒီလိုပဲ ယုံကြည်ထားပါတယ်၊ ဒါပေမယ့် အဲဒါက ရောင်းဖြစ်မှာ မဟုတ်ပါဘူး။"
အမေရိကန်သား ဟင်နရီဟာ အီးမေးလ်နဲ့ ပြုလုပ်တဲ့ အမေးအဖြေကဏ္ဍမှာ ပြောဆိုနေခဲ့တာပါ။
FSG ဟာ လီဗာပူးလ်မှာ နှစ်အတော်ကြာ ရင်းနှီးမြုပ်နှံဖို့ လမ်းဖွင့်ထားပြီး ဒီလုပ်ငန်းစဉ်မှာ မော်ဂန် စတန်လီနဲ့ Goldman Sachs တို့ကို မကြာသေးခင်က စေ့စပ်ညှိနှိုင်းခဲ့ပါတယ်။
"LFC နဲ့ပတ်သက်တဲ့ စကားဝိုင်းတွေနဲ့ ကိုးကားပြောဆိုမှုတွေ အများကြီးရှိတယ်ဆိုတာ ကျနော် သိပါတယ်။ ဒါပေမယ့် အချက်အလက်တွေကို ကျနော် ဆက်ထိန်းထားပါတယ်၊ ကျနော်တို့ လုပ်နေတဲ့ လုပ်ငန်းစဉ်ကို တရားဝင်လုပ်လိုက်ရုံပါပဲ"လို့ ဟင်နရီက ပြောပါတယ်။
အန်းဖီးလ်မှာ အင်္ဂါနေ့မှာ ချန်ပီယံလိဂ် ရှုံးထွက် ၁၆ သင်းအဆင့် ပထမအကျော့မှာ လီဗာပူးလ်နဲ့ ရီးယဲလ်မက်ဒရစ်တို့ မတွေ့ဆုံခင် သူ့ရဲ့မှတ်ချက်တွေကို ထုတ်ပြန်ခဲ့တာ ဖြစ်ပါတယ်။
လီဗာပူးလ်အသင်းဟာ နောက်ဆုံးကစားခဲ့တဲ့ ပရီးမီးယားလိဂ် ၂ ပွဲ အနိုင်ရရှိကာ အမှတ်ပေးဇယား အဆင့် ၈ ကို တက်ရောက်သွားပါတယ်။
FSG ဟာ ပိုင်ရှင်ဟောင်း တွမ်ဟစ်စ်နဲ့ ဂျော့ချ် ဂျီးလတ်တို့ရဲ့ အငြင်းပွားဖွယ် သက်တမ်း အပြီးမှာ လီဗာပူးလ်ကို ပေါင်သန်း ၃၀၀ နဲ့ ဝယ်ယူခဲ့ပါတယ်။
အမေရိကန်ဘတ်စကက်ဘောကြယ်ပွင့် လီဘရွန်ဂျိမ်းဟာ ၂၀၁၁ ကတည်းက လီဗာပူးလ်အသင်းရဲ့ တစိတ်တစ်ပိုင်းပိုင်ရှင်ဖြစ်ခဲ့ပြီး ပေါင် ၄.၇ သန်း တန် ရှယ်ယာ ၂ ရာခိုင်နှုန်း ပိုင်ဆိုင်ပါတယ်။
Boston Red Sox ဘေ့စ်ဘောအသင်းကိုလည်း ပိုင်ဆိုင်တဲ့ လီဘရွန်ဂျိမ်းဟာ အဲဒီချိန်ကစလို့ FSG မှာ မိုင်နာလုပ်ဖော်ကိုင်ဖက်တစ်ဦးဖြစ်လာခဲ့ပါတယ်။
၂၀၂၁ မတ်လမှာ ပုဂ္ဂလိကရင်းနှီးမြှုပ်နှံမှုကုမ္ပဏီ RedBird Capital Partners ဟာ FSG မှာ ရှယ်ယာတစ်ခုကို ဒေါ်လာ ၇၃၅ သန်း (ပေါင် ၅၃၃ သန်း) ခန့်နဲ့ ဝယ်ယူခဲ့ပါတယ်။
(BBC)
