မကွေးတိုင်း ရေစကြိုမြို့နယ် အမှတ် (၂၅၈) တပ်ရင်းမှ ကံသစ်ကျေးရွာတောင်ဘက်သို့ ကင်းပုန်းလာဝပ်သည့် စစ်ကောင်စီတပ်ဖွဲ့ဝင်များကို ဖေဖော်ဝါရီလ ၁၆ရက်နေ့ နေ့လယ်ပိုင်းတွင် ဒရုန်းဖြင့် အီနာဂါဗုံးသီး နှစ်လုံးချ၍ တိုက်ခိုက်ခဲ့ရာ ထိခိုက်မှုများရှိနိုင်ကြောင်း ပြည်သူ့ကာကွယ်ရေးတပ်ဖွဲ့ ရေစကြိုမှ တာဝန်ရှိသူ တစ်ဦးက ပြောသည်။
၎င်းက “ (၂၅၈) ထဲက လာတဲ့ စစ်ကောင်စီတပ်သား အင်အား ၃၀လောက် နဲ့ လူကြီးလမ်းကြောင်းရှိလို့ ကံသစ်ရွာကိုလာပြီးတော့ ကင်းပုန်းလာဝပ်ကြတာကို ကျတော်တို့ ဒရုန်းနဲ့ တိုက်ခိုက်ခဲ့တာ ထိတာတော့ ထိတယ် အသေးစိတ်ကိုတော့ စုံစမ်းနေဆဲဖြစ်တယ် “ ဟုပြောသည်။
အမှတ် (၂၅၈) တပ်ရင်းမှ ကံကြီးတောင်ရွာဘက်သို့ ဒုတိယအကြိမ်ကင်းပုန်းလာဝပ်ခြင်းဖြစ်ပြီး ပထမအကြိမ် ကင်းပုန်းလာဝပ်ချိန်ကလည်း ဒရုန်းဖြင့်တိုက်ခိုက်ခဲ့ကြကြောင်း ရေစကြို ပကဖ မှ တာဝန်ရှိသူက ပြောသည်။
“ အဲ့နေရာကို ကင်းပုန်းဝပ်တာ ဒါဒုတိယအကြိမ်ဝပ်တာ ပထမအကြိမ်တုန်းကလည်း ဒရုန်းနဲ့ တိုက်ခိုက်ခဲ့သေးတယ်” ဟု ၎င်းက ပြောသည်။
စစ်ကောင်စီတပ်များသည် လက်ရှိအချိန်တွင် ရေစကြိုမြို့ပေါ်၌ ကာကွယ်ရေးတပ်ဖွဲ့ များ၏ လှုပ်ရှားမှုကို ထိန်းချုပ်နိုင်ရေးအတွက် အင်အားတိုးမြှင့်ချထားလျက် ရှိကြောင်းသိရသည်။
ဖေဖော်ဝါရီလ ၁၄ ရက်နေ့တွင်လည်း ရေစကြိုမြို့နယ် အမှတ်( ၁ ) အထက်တန်းကျောင်းရှေ့တွင် လုံခြုံရေးယူနေသည့် စစ်ကောင်စီတပ်ဖွဲ့ဝင်များကို မိုင်းဆွဲတိုက်ခိုက်ခဲ့ရာ စစ်ကောင်စီတပ်ဖွဲ့ဝင် လေးဦး အပြင်းအထန်ဒဏ်ရာရရှိသွားကြောင်း ရေစကြို မြို့နယ် ပြည်သူ့ကာကွယ်ရေးတပ်ဖွဲ့ က ထုတ်ပြန်ထားသည်။
စာတည်း - သန့်ဇော်(သန်လျင်)
