နေပြည်တော်တွင် လရောင်တောစီမံကိန်းအတွက် ဒေါ်ခင်ကြည်ဖောင်ဒေးရှင်းက လျှောက်ထားရယူခဲ့သည့် မြေနေရာများကို နိုင်ငံပိုင်သိမ်းရန် စစ်ကောင်စီဘက်မှ လျှောက်ထားချက်ကို ပြည်ထောင်စုတရားလွှတ်တော်ချုပ်တွင် အပြီးသတ်အမိန့်ချမှတ်ရန် ရှိနေကြောင်း တရားရုံးနှင့် နီးစပ်သည့် အသိုင်းအဝိုင်းမှ သိရသည်။
ဖေဖော်ဝါရီလ ၁၅ ရက်နေ့က ပြည်ထောင်စုတရားလွှတ်တော်ချုပ်တွင် ဒေါ်ခင်ကြည်ဖောင်ဒေးရှင်းကိစ္စ ဒေါ်အောင်ဆန်းစုကြည်ဘက်က အယူခံတက်ထားသည့် အမှုလေးမှု နှင့် အမိန့်ချရာတွင် မြေကို နိုင်ငံပိုင်မသိမ်းသည့်ကိစ္စ စစ်ကောင်စီဘက်က ပြင်ဆင်မှုတက်ထားသည့် အမှုသုံးမှုတို့ကို နှစ်ဖက်လျှောက်လဲချက်ကြားနာခဲ့သည်။
“အဲ့တာတွေအားလုံး ကြားနာပြီးတော့ အမိန့်ချဖို့ သီးသန့်ထားတာပေါ့။ တစ်လနီးပါး တစ်လကျော်ကျော်လောက်ကြာမယ်။ ပြီးရင်တော့ အမိန့်ချမယ်ပေါ့”ဟု တရားရုံးနှင့် နီးစပ်သူတစ်ဦးက ပြောသည်။
ဒေါ်ခင်ကြည်ဖောင်ဒေးရှင်းက လရောင်တောစိုက်ပျိုးသက်မွေးပညာသင်တန်းကျောင်း စီမံကိန်းအတွက် နေပြည်တော်ဥတ္တရသီရိမြို့နယ်တွင် မြေ ၁၀၁ ဒသမ ၃၃ ဧက၊ ပုဗ္ဗသီရိမြို့နယ်တွင် ၂၃ ဒသမ ၈၅၅ ဧက လျှောက်ထားရယူခဲ့သည့် မြေများနှင့် လရောင်တောမြေနေရာတွင် ဒေါ်ခင်ကြည်ဖောင်ဒေးရှင်း ဥက္ကဋ္ဌနေထိုင်ရန် ဆောက်လုပ်ထားသည့် တစ်ထပ်အဆောက်အဦကို နိုင်ငံပိုင်သိမ်းရန် စစ်ကောင်စီဘက်က လျှောက်ထားခြင်းဖြစ်သည်။
ဒေါ်အောင်ဆန်းစုကြည်အနေဖြင့်မူ အဆိုပါဒေါ်ခင်ကြည်ဖောင်ဒေးရှင်းကိစ္စနှင့် ဆက်စပ်စွဲဆိုထားသည့် အမှု လေးမှုဖြင့် ၎င်းအပေါ် ပြစ်ဒဏ်တစ်ပေါင်းတည်း စုစုပေါင်း ထောင်ဒဏ် ခြောက်နှစ် ချမှတ်ခဲ့သည်အပေါ် အယူခံတက်ခဲ့ခြင်းဖြစ်သည်။
အဆိုပါ ဒေါ်ခင်ကြည်ဖောင်ဒေးရှင်းကိစ္စ အမှုများတွင် NLDအစိုးရလက်ထက် နေပြည်တော်မြို့တော်ဝန် ဒေါက်တာမျိုးအောင်၊ ဒုတိယမြို့တော်ဝန် ဦးရဲမင်းဦးနှင့် နေပြည်တော် စည်ပင်သာယာရေးကော်မတီအဖွဲ့ဝင် ဦးမင်းသူတို့လည်း ပူးတွဲစွပ်စွဲခံခဲ့ရပြီး ထောင်ဒဏ် သုံးနှစ်စီ အမိန့်ချခံထားရသည်။
စာတည်း - သန့်ဇော်(သန်လျင်)
