တရုတ်တွင် ဒီဇင်ဘာ ၂၂ ရက်ဝန်းကျင်က နေ့စဉ်ကိုဗစ်-၁၉ ကူးစက်ခံရသည့်အတည်ပြုလူနာမှာ တစ်ရက်လျှင် ၇ သန်း ကျော်ဖြင့် အများဆုံးတွေ့ရှိခဲ့ရပြီး ဇန်နဝါရီ ၄ ရက်တွင် သေဆုံးမှု ၄ ဝဝဝ ကျော်ဖြင့် အရေအတွက်အများဆုံးဖြစ်ခဲ့ကြောင်း တရုတ်ရောဂါထိန်းချုပ်ရေးနှင့် ကာကွယ်ရေးဗဟိုဌာနမှ ဇန်နဝါရီ ၂၅ ရက်တွင် ပြောသည်။
တရုတ်လူဦးရေ ၁ ဒသမ ၄ ဘီလီယံ၏ ၈၀ ရာခိုင်နှုန်းမှာ ကိုဗစ်-၁၉ ကူးစက်ခံရပြီး လာမည့် ၂ လ သို့မဟုတ် ၃ လအတွင်း တစ်ကျော့ပြန် ကိုဗစ်-၁၉ ကူးစက်မှုဖြစ်ပွားနိုင်ကြောင်း ထင်ရှားသော အစိုးရသိပ္ပံပညာရှင်တစ်ဦးက ပြောကြားပြီးနောက် တရုတ်ရောဂါထိန်းချုပ်ရေးနှင့် ကာကွယ်ရေးဌာန၏ ဝက်ဘ်ဆိုက်တွင် ယင်းကိန်းဂဏန်းများကို ဖော်ပြလာခဲ့ခြင်းဖြစ်သည်။
" ရောဂါကူးစက်ခံရသူအရေအတွက်နှင့် ဖျားနာသည့် ပြင်ပလူနာအရေအတွက်သည် ၂၀၂၂ ခုနှစ် ဒီဇင်ဘာ ၂၂ ရက်ဝန်းကျင်တွင် အထွတ်အထိပ်သို့ ရောက်ရှိသွားပြီး ရောဂါကူးစက်မှုအသစ်အရေအတွက်မှာ တစ်နေ့လျှင် ၇ သန်းကျော်ရှိကာ နေ့စဉ် ပြင်ပလူနာအရေအတွက်မှာ ၂ ဒသမ ၈၆၇ သန်းရှိသည်” ဟု ဆိုသည်။
တရုတ်ဆေးခန်းများ၊ အရေးပေါ်ခန်းများတွင် စိုးရိမ်ရသည့် ကိုဗစ်-၁၉ လူနာများနှင့် ပြည့်နှက်နေသည့် ကာလကို ကျော်လွန်သွားပြီဖြစ်ကြောင်း နိုင်ငံတော်ကျန်းမာရေးကော်မရှင်မှ တာဝန်ရှိသူတစ်ဦးက ပြီးခဲ့သည့် သီတင်းပတ်က ပြောကြားခဲ့သည်။
တရုတ်တွင် တင်းကျပ်သော ကိုဗစ်-၁၉ မူဝါဒကို ရုတ်တရက်ရုပ်သိမ်းပြီးနောက် တစ်လခန့်အကြာ ဇန်နဝါရီ ၁၂ ရက်အထိ ဆေးရုံတွင် လူ ၆၀ ဝဝဝ နီးပါး သေဆုံးခဲ့ကြောင်း အစိုးရအချက်အလက်များက ဖော်ပြနေသည်။
သို့သော် နေအိမ်တွင် သေဆုံးသူများအား ထည့်မတွက်ထားသလို သေဆုံးရသည့်အကြောင်းရင်းကို ကိုဗစ်ကြောင့်သေဆုံးခြင်းဟု မဖော်ပြရန် ဆရာဝန်များကို ဖိအားပေးထားခြင်းတို့ကြောင့် အဆိုပါကိန်းဂဏန်းများသည် အမှန်တကယ်အရေအတွက်အောက် များစွာ နည်းနိုင်သည်ဟု ကျွမ်းကျင်သူအချို့က ပြောကြားသည်။
