(မဇ္စျိမ)။ ။စစ်ကောင်စီတပ်သားများ ပြည်သူနှင့်ပူးပေါင်းပြီး စစ်အာဏာရှင်စနစ်ဆိုးအား ဖယ်ရှားကြရန် CDM စစ်သားများက စစ်အာဏာသိမ်းမှု နှစ်နှစ်ပြည့်သည့် ယနေ့ ဖေဖော်ဝါရီလ ၁ ရက်တွင် ထပ်မံ တိုက်တွန်းချက် ထုတ်ပြန်သည်။

တပ်မတော်သားများ၏ မူလတာဝန်သည် နိုင်ငံတော်နှင့် ပြည်သူလူထု၏ အကျိုးစီးပွား၊ အသက်အိုးအိမ် စည်းစိမ်များအား အကာအကွယ်ပေးရန်ဖြစ်ပြီး၊ ယနေ့ နိုင်ငံတော်တွင် ကြုံတွေ့နေရသည့် နိုင်ငံရေးပြဿနာများအား အမြန်ဆုံးကုစားနိုင်ရန်အတွက် အဓိကစွမ်းဆောင်နိုင်သူများဖြစ်ပြီး ပြည်သူလူထု၏အကျိုးစီးပွားကို ကာကွယ်စောင့်ရှောက်ပေးလိုသည့် တပ်မတော်သားများအနေဖြင့် စစ်ကောင်စီတပ်ကိုစွန့်ခွာပြီး ပြည်သူ့ဘက်သို့အချိန်မီ ကူးပြောင်းရပ်တည်ကြရန် လိုအပ်သည်ဟု ဆိုသည်။

ထို့ကြောင့် ရဲဝံ့စွန့်လွှတ်သည့်စိတ်ဖြင့် အမှန်တရားကိုချစ်မြတ်နိုးသည့် တပ်မတော်သားများအနေဖြင့် နွေဦးတော်လှန်ရေးကြီးတွင် ပြည်သူလူထုနှင့်အတူ လက်တွဲပူးပေါင်းပြီး စစ်အာဏာရှင်စနစ်ဆိုးကို အပြီးတိုင်ဖယ်ရှားကာ "တပ်မတော်၏ပုံရိပ်နှင့် ဂုဏ်သိက္ခာ" ကို ပြန်လည်ရယူဆယ်တင်ကြရန် အလေးအနက်ထား တိုက်တွန်းအပ်သည်ဟု ထုတ်ပြန်ချက်တွင် ပါရှိသည်။

ယနေ့ နိုင်ငံအဝှမ်းတွင် တွေ့ကြုံရင်ဆိုင် ခံစားနေရသည့် နိုင်ငံရေးပြဿနာများအားလုံး၏ ပင်မအကြောင်းရင်းခံ တာဝန်ရှိသူများသည် အာဏာသိမ်းစစ်ခေါင်းဆောင် မင်းအောင်လှိုင်နှင့် အပေါင်းပါ လက်တစ်ဆုပ်စာ စစ်ဗိုလ်ချုပ်ကြီးများသာ ဖြစ်ပြီး နိုင်ငံအနှံ့စစ်တပ်၏ စစ်ရာဇဝတ် ကျူးလွန်နေမှုများတွင် ပါဝင်ပတ်သက်နေသည့် လက်အောက်ခံတပ်မှူး တပ်သားများသည်လည်း တော်လှန်ရေးအလွန် ပြည်သူ့တရားစီရင်ရေးတွင် မလွဲမသွေ အပြစ်ပေးအရေးယူ ခံရမည်ဖြစ်ကြောင်း CDM စစ်သားများက သတိပေးထားသည်။

၂၀၂၁ ဖေဖော်ဝါရီလ ၁ ရက်နေ့တွင် စစ်ခေါင်းဆောင် မင်းအောင်လှိုင်နှင့် အပေါင်းပါစစ်ဗိုလ်ချုပ်ကြီးများသည် မဲမသမာမှုဟု အကြောင်းပြကာ လက်နက်အားကိုးဖြင့် ပြည်သူလူထုမှ ရွေးကောက်တင်မြှောက်ထားသည့် အရပ်သားအစိုးရအဖွဲ့အား ဖမ်းဆီးထိန်းသိမ်းပြီး စစ်အာဏာသိမ်းမှု ကျူးလွန်ခဲ့ကြသည်။

စစ်ခေါင်းဆောင်များသည် အာဏာသိမ်းမှုအား ဆန့်ကျင်ဆန္ဒပြခဲ့ကြသည့် ပြည်သူလူထုကို မတရား ဖိနှိပ်ရက်စက်၊ ဖမ်းဆီး၊ ပစ်ခတ်သတ်ဖြတ်စေခြင်းများ ပြင်းပြင်းထန်ထန် ကျူးလွန်ရက်စက်ခဲ့ကြသည့်အတွက် နိုင်ငံအနှံ့ လက်နက်ကိုင်တော်လှန်မှုများ ပေါ်ပေါက်လာခဲ့ပြီး တိုးတက်ခါစ နိုင်ငံတော်ဟာ အဘက်ဘက်မှ ဆုတ်ယုတ်ကျဆင်းပျက်စီးခဲ့ရသည်ဟု CDM စစ်သားများက ဆိုသည်။

မင်းအောင်လှိုင်နှင့် ထိပ်ပိုင်းစစ်ခေါင်းဆောင်များသည် ၎င်းတို့၏ အာဏာအကျိုးစီးပွားအတွက် စစ်တပ်ကိုအသုံးချကာ နေ့စဉ်နှင့်အမျှ ပြည်သူလူထုအား ဖမ်းဆီးသတ်ဖြတ် နှိပ်စက်မှုများကြောင့် တပ်မတော်၏ဂုဏ်သိက္ခာနှင့် အနာဂတ်ပျောက်ဆုံးခဲ့ရသလို၊ ပြည်သူလူထုက ရွံရှာမုန်းတီး စက်ဆုပ်သည့် အကြမ်းဖက်စစ်တပ်အဖြစ် ကျဆင်းခဲ့ရကြောင်း CDM စစ်သားများ၏ ထုတ်ပြန်ချက်တွင် ပါရှိသည်။

စာတည်း - သန့်ဇော်(သန်လျင်)