တရုတ်နိုင်ငံတွင် တင်းကျပ်သော ကိုဗစ်လုံးဝကင်းစင်ရေးမူဝါဒကို ပြန်လည်ရုပ်သိမ်းပြီးနောက် ကိုဗစ်-၁၉ ကူးစက်မှု ပြန်လည်မြင့်တက်လာသဖြင့် ကနေဒါကလည်း အခြားနိုင်ငံများနည်းတူ တရုတ်ပြည်မကြီး၊ ‌ဟောင်ကောင် နှင့် မကာအိုမှ လာသော ခရီးသည်များကို  ကိုဗစ်-၁၉ စစ်ဆေးမှုများ မဖြစ်မနေ လုပ်ဆောင်တော့မည်ဖြစ်ကြောင်း ကနေဒါ အခြေစိုက် Television Network CTV ရုပ်သံဌာနက ထုတ်လွှင့်ခဲ့သည်။ 

ကနေဒါအစိုးရက   အဆိုပါဒေသများမှ ဆိုက်ရောက်ခရီးသည်များအား ဇန်နဝါရီ ၅ ရက်မှစတင်ကာ ကိုဗစ်စစ်ဆေးမှုပြုလုပ်မည်ဟု ကြေညာခဲ့ပြီး အသက် ၂ နှစ် နှင့် အထက်ခရီးသည်များသည် ကနေဒါသို့မလာရောက်မီ ကိုဗစ်ကင်းစင်ကြောင်း ဆေးစစ်ချက် ရှိရန်လိုအပ်သည်ဟု ဆိုသည်။
ဗြိတိန်အစိုးရကလည်း တရုတ်နိုင်ငံမှ ရောက်ရှိလာသော ခရီးသည်များအား ကိုဗစ်-၁၉ အကြိုစစ်‌ဆေးမှု လိုအပ်ကြောင်း ဒီဇင်ဘာ ၂၉ ရက်နေ့က ကြေညာခဲ့သည်။
ထို့အတူ ပြင်သစ်က  တရုတ်နိုင်ငံမှ ခရီးသွားများအတွက် မထွက်ခွာမီ ၄၈ နာရီအတွင်း စမ်းသပ်ထားသည့် ကိုဗစ်စစ်ဆေးချက်လိုအပ်ကြောင်း ကြေညာခဲ့သည်။
ခရီးတစ်ထောက်နားမှုအပါအဝင် တရုတ်နိုင်ငံမှ လာသော လေယာဉ်ခရီးစဉ်အားလုံးမှခရီးသည်များသည် ကိုဗစ်စစ်ဆေးမှု ပြုလုပ်ရမည်ဖြစ်ကာ နှာခေါင်းစည်းများလည်း တပ်ဆင်ရမည်ဖြစ်သည်။
တရုတ်နိုင်ငံ၌ နိုဝင်ဘာလက ဒေတွင်း ကိုဗစ်-၁၉ ဖြစ်ပွားမှု စံချိန်တင်တိုးလာခဲ့သည်။
ရောဂါကူးစက်မှု အခြေအနေများ ပိုမိုဆိုးရွားလာခြင်းကြောင့် အာဏာပိုင်များက ဒေသခံများအား နေ့စဉ် ဓာတ်ခွဲစမ်းသပ်မှုများ လုပ်ဆောင်စေကာ အချို့နေရာများတွင် တစ်စိတ်တစ်ပိုင်း အသွားအလာပိတ်ဆို့မှုများ ချမှတ်ခဲ့သည်။  
ပေကျင်းနှင့် ရှန်ဟိုင်း အပါအဝင် တရုတ်နိုင်ငံ အဓိက မြို့ကြီးများတွင် အထူးသဖြင့် နိုဝင်ဘာ ၂၄ ရက်မှ စတင်၍ ကန့်သတ်စီမံချက်များ တင်းကျပ်ခဲ့သည်။