တရုတ်တွင် မကြုံစဖူး ကိုဗစ်ကပ်ရောဂါကူးစက်ဖြစ်ပွားလာကာ ဆေးဝါးရရှိမှု အကန့်အသတ်ရှိလာသောကြောင့် ပြည်သူများအနေဖြင့် ကိုဗစ်-၁၉ သောက်ဆေးများကို မှောင်ခိုဈေးကွက်တွင် ဝယ်ယူနေကြရသည်။

တရုတ်သည် ယခုနှစ်တွင် ကိုဗစ်-၁၉ ဗိုင်းရပ်စ်တိုက်ဖျက်ဆေး ၂ မျိုးဖြစ်သည့် Pfizer ထုတ် Paxlovid ဆေးနှင့် တရုတ်ကုမ္ပဏီ Genuine Biotech မှ HIV ဆေး Azvudine တို့ကို အတည်ပြုခဲ့သည်။ ထိုဆေး ၂ မျိုးလုံးကို အချို့ ဆေးရုံများတွင်သာ ရနိုင်သည်။

ဆေးဝါးများကို အကန့်အသတ်ဖြင့်သာရမှုနှင့် မြင့်မားသော ဈေးနှုန်းများကြောင့် တရုတ်နိုင်ငံသားအများအပြားမှာ ဈေးသက်သာပြီး အိန္ဒိယမှတင်သွင်းသော ဆေးများကို မဖြစ်မနေ ရွေးချယ်လာရသည်။

ကိုဗစ်တိုက်ဖျက်သော အိန္ဒိယဆေးများကို တစ်ဗူးလျှင်င် ယွမ် ၁ ၀၀၀ (အမေရိကန်ဒေါ်လာ ၁၄၄) ဖြင့်ရောင်းသည် ဆိုသော ကြော်ငြာများမှာ တရုတ်လူမှုမီဒီယာပလက်ဖောင်း Weibo တွင် ခေတ်စားနေပြီး အင်တာနက် အသုံးပြုသူများက ဆေးရနိုင်မည့်နည်းလမ်းများကို အချင်ချင်း အသိပေးနေကြသည်။

အိန္ဒိယမှ ကိုဗစ်တိုက်ဖျက်ရေး ဆေး ၄ မျိုးကို တရုတ်ဈေးကွက်တွင် Primovir၊ Paxista၊ Molnunat နှင့် Molnatris ဟူသော အမှတ်တံဆိပ်များဖြင့် တရားမဝင် ရောင်းချလျက်ရှိသည်။

သို့သော် အိန္ဒိယမှ အဆိုပါ ဆေးများကို တရုတ်အစိုးရက အတည်မပြုသေးသောကြောင့် ရောင်းချပါက အပြစ်ပေးနိုင်သော ပြစ်မှုဖြစ်သည်။

အွန်လိုင်းရောင်းဝယ်ရေး လုပ်ငန်းအချို့က စကားလုံးအသုံးပြုမှုအပေါ် စောင့်ကြည့် စိစစ်မှုကို ရှောင်ရှားနိုင်ရန် ဆေးများကို အမည်လွှဲများဖြင့် ရောင်းချကြသည်။