မတ် ၉ ၊ ရန်ကုန်။ ။ ရတနာပုံအသင်း၏ ကွင်းလယ်လူစည်သူအောင်သည် ပြီးခဲ့သည့် လိဂ်ပွဲစဉ် (၉) ရတနာပုံအသင်းနှင့် မကွေးအသင်းတို့ ပွဲ မတိုင်ခင် လေ့ကျင့်ရေးကွင်းတွင် နည်းပြချုပ်ရီနီနှင့် စကားအချေအတင်ဖြစ်ကာ အသင်းမှ ပြန်လည်စေလွှတ်ခဲ့ရခြင်းအား အသင်းပိုင်ရှင် ဒေါက်တာစိုင်းက ဝင်ရောက်ညှိနှိုင်းပေးမည် ဖြစ်သည်။ အဆိုပါဖြစ်ရပ်ကြောင့် စည်သူအောင်သည် လက်ရှိတွင် ရတနာပုံအသင်းတွင် လာရောက်လေ့ကျင့်ခွင့်မရရှိပဲ မကွေးအသင်းနှင့်ပွဲ၌လည်း ပါဝင်ကစားခွင့် ရရှိခြင်း မရရှိပေ။
“ ပြီးခဲ့တဲ့ မကွေးနဲ့ ပွဲမတိုင်ခင်မှာတုန်းက လေ့ကျင့်ရေးကွင်းမှာ နည်းပြနဲ့ အဆင်မပြေဖြစ်ပြီး အသင်းက ပြန်လည်စေလွှတ်ခံခဲ့ရတာပါ။ လာမယ့် သောကြာနေ့မှာတော့ အသင်းပိုင်ရှင်ဒေါက်တာစိုင်းက ခေါ်ထားပါတယ်။ အသင်းပိုင်ရှင်နဲ့ ညှိနှိုင်းပြီးမှပဲ ကျန်တဲ့ကိစ္စတွေ ကျွန်တော့်ဘက်က ပြောပါရစေ ” ဟု ရတနာပုံကွင်းလယ်လူ စည်သူအောင်က ပြောသည်။
စည်သူအောင်သည် ပြီးခဲ့သည့်နှစ်တွင်လည်း ကမ္ဘာ့ဖလားခြေစစ်ပွဲဝင်ရောက်ယှဉ်ပြိုင်သည့် လက်ရွေးစင်အသင်း လေ့ကျင့်ရေး အစီအစဉ်ပျက်ကွက်မှုဖြင့် ပြစ်ဒဏ်ကျခံခဲ့ရပြီး ယခုနှစ် ၂၀၁၆ ဘောလုံးရာသီ ရတနာပုံအသင်း၏ ရာသီအစ လိဂ်ပွဲစဉ် ၆ ပွဲအား လွဲချော်ခဲ့သည်။
“ စည်သူအောင်ရဲ့ကိစ္စနဲ့ ပတ်သက်ပြီး အသင်းပိုင်ရှင်ရဲ့ ဆုံးဖြတ်ချက်အတိုင်းပဲ ဆက်လုပ်သွားမှာပါ။ ဒီရက်ပိုင်းအတွင်း အမြန်ဆုံး ဆုံးဖြတ်သွားမှာပါ။ သိရပြီ ဆိုရင်လည်း အားလုံးသိအောင် သတင်းထုတ်ပြန်ပေးသွားမှာပါ။ လောလောဆယ်တော့ စည်သူအောင်က အသင်းက ပြန်လွှတ်လိုက်တဲ့အတွက် အသင်းနဲ့အတူ လေ့ကျင့်ခန်း လာဆင်းတာမျိုးတော့ မရှိပါဘူး ” ဟု စည်သူအောင်၏ဖြစ်ရပ်နှင့် ပတ်သက်၍ ရတနာပုံအသင်း မီဒီယာတာဝန်ခံ ကိုအောင်ဟိန်းခိုင် က ပြောသည်။
ရတနာပုံအသင်း၏ နည်းပြရီနီလက်ထက်တွင် ကစားသမားများနှင့် အချင်းများမှုများ မကြာခဏဖြစ်ပေါ်ခဲ့ပြီး ပြီးခဲ့သည့် ၂၀၁၅ ဘောလုံးရာသီတွင် အသင်း၏ အဓိကဂိုးသမား သီဟစည်သူကိုလည်း အသင်းမှ ထုတ်ပယ်ခြင်းဖြစ်ရပ်များ ဖြစ်ပေါ်ခဲ့ဖူးသည်။
စည်သူအောင်သည် လက်ရွေးစင်အသင်းပြစ်ဒဏ်ကြောင့် ယခုနှစ် ၂၀၁၆ ဘောလုံးရာသီတွင် ဇွဲကပင်နှင့် ရတနာပုံပွဲ၊ ရှမ်းယူနိုက်တက်နှင့် ရတနာပုံပွဲ စသည့် နှစ်ပွဲသာ ရတနာပုံအသင်းအတွက် ပွဲထွက်ပါဝင်ကစားခွင့် ရရှိထားသေးသည်။
