ပါကစ္စတန်နိုင်ငံတွင် ပြည်ပကြွေးမြီများနှင့် အတိုးများ ပြန်လည်ပေးဆပ်ရမည့် ဝန်ထုပ်ဝန်ပိုးများက တိုးလာလျက် ရှိသည်။
အဆိုပါနိုင်ငံတွင် အဓိကအားဖြင့် ယခင်ပေးစရာရှိသည့် ငွေများကို ပြန်လည်ပေးဆပ်ရန်နှင့် စာရင်းရှင် လိုငွေပြမှုကို ငွေကြေးထောက်ပံ့ရန် အပါအဝင် ကြွေးမြီများက ဆက်လက်စုပုံလာသည်။
ပါကစ္စတန်သည် နိုဝင်ဘာမှ အောက်တိုဘာလအထိ ၁၂ လအတွင်း ဒေါ်လာ ၂၆ ဒသမ ၃ ဘီလီယံတန်ဖိုးရှိ ပြည်ပကြွေးမြီ အတိုးအရင်းကို ပြန်လည်ပေးဆပ်သွားရန် စီစဉ်ထားကြောင်း ပါကစ္စတန်ဗဟိုဘဏ် (SBP) ၏ ကိန်းဂဏန်းအချက်အလက်များကို ကိုးကားပြီး ရင်းနှီးမြှုပ်နှံမှု အကျိုးဆောင်ကုမ္ပဏီ Optimus Capital Management က ဖော်ပြသည်။
“ရှေ့လာမယ့် ၁၂ လမှာ ပြည်ပ ကြွေးမြီ အတိုးအရင်း ပေးဆပ်စရာပမာဏတွေက ဒေါ်လာ ၂၆ ဒသမ ၃ ဘီလီယံ ရှိပါတယ်။ အဲဒီထဲမှာ ၂၀၂၂ ဒီဇင်ဘာနဲ့ ၂၀၂၃ ဇန်နဝါရီမှာ ပေးဆပ်ရမယ့် ဒေါ်လာ ၈ ဒသမ ၉ ဘီလီယံလည်း ပါဝင်ပါတယ်” ဟု ရင်းနှီးမြှုပ်နှံမှုဆိုင်ရာ အကျိုးဆောင်ကုမ္ပဏီက ပြောသည်။
ပြီးခဲ့သည့် ၁၁ လအတွင်း ပါကစ္စတန်နိုင်ငံ၏ နိုင်ငံခြားအရန်ငွေများက သီတင်းပတ် ၅ပတ်သာသာ သွင်းကုန် တင်သွင်းမှုများအတွက် ကျခံရန် လုံလောက်တော့သည့် ပမာဏအထိ ကြောက်ခမန်းလိလိ လျော့ကျခဲ့ပြီး ဒေါ်လာ ၇ ဒသမ ၅ ဘီလီယံဖြင့် ရပ်တည်နေသည်။
ပြီးခဲ့သည့် လများအတွင်း နိုင်ငံတကာ ငွေကြေးရန်ပုံငွေအဖွဲ့ (IMF) နှင့် အာရှဖွံ့ဖြိုးရေးဘဏ် (ADB) တို့ထံမှ ချေးငွေအသစ်များ ရရှိခဲ့သော်လည်း ပါကစ္စတန်၏ နိုင်ငံခြားအရန်ငွေများက လျော့နည်းနေသည်။