လက်ဝှေ့ကနေ အနားယူခဲ့တဲ့ ချန်ပီယံဟောင်း မန်နီ ပက်ကွီအိုဟာ ဒီသီတင်းပတ်ကုန်မှာ ကိုရီးယား ကိုယ်ခံပညာရှင် DK Yoo နဲ့ သူ့ရဲ့ သရုပ်ပြပွဲအတွက် တောင်ကိုရီးယားကို ရောက်ရှိနေပြီဖြစ်ပါတယ်။

ဝိတ်တန်း ၈ ခု ကမ္ဘာ့ချန်ပီယံဟောင်းဟာ နည်းပြ ဘူဘွိုင်း ဖာနန်ဒက်ဇအပါအဝင် သူ့အဖွဲ့သားတွေနဲ့အတူ တောင်ကိုရီးယားကို သွားရောက်ခဲ့တာပါ။

၆ ချီ သရုပ်ပြပွဲကို တောင်ကိုရီးယားနိုင်ငံ၊ ဆိုးလ်မြို့က ဆိုးလ်အာရီနာမှာ တနင်္ဂနွေနေ့မှာ ကျင်းပမှာဖြစ်ပါတယ်။

ပက်ကွီအိုဟာ ယူကရိန်းနဲ့ ဖိလစ်ပိုင်က အိုးမဲ့အိမ်မဲ့တွေအတွက် ရန်ပုံငွေရှာဖွေမယ့် ပရဟိတထိုးပြပွဲအတွက် General Santos City မှာ အပြင်းအထန် လက်ဝှေ့လေ့ကျင့်မှု ပြုလုပ်ခဲ့ပါတယ်။

"ကျနော် အရမ်းပျော်သလို စိတ်လှုပ်ရှားပြီး ကိုရီးယားလက်ဝှေ့ပရိသတ်အားလုံးကို ကျေးဇူးတင်ပါတယ်။ ကိုရီးယားလက်ဝှေ့ဝါသနာရှင်တွေအားလုံးကို ကျေးဇူးတင်ပါတယ်။ ကျေးဇူးပြုပြီး DK Yoo နဲ့ လာမယ့် တနင်္ဂနွေနေ့မှာ ကျင်းပမယ့် သရုပ်ပြပွဲကို ကြည့်ရှုပေးပါ။ ကြိုးဝိုင်းထဲမှာ နောက်ထပ် လှုပ်ရှားမှုတွေ ထပ်ရှိဦးမှာပါ။ ကျေးဇူးတင်ပါတယ်။"လို့ ပက်ကွီအိုက ပြောပါတယ်။

ပက်ကွီအိုနဲ့ Yoo နှစ်ဦးစလုံးဟာ ဘယ်လက်သန်သူတွေဖြစ်ပြီး အသက်အရွယ်အရ ၄၃ နှစ်စီရှိကြပါတယ်။

"Warfare Combat System" ကို ဖန်တီးခဲ့သူ Yoo ဟာ  5-foot-10 အရွယ်အစား အားသာချက်ကို နှစ်သက်ပါတယ်။

Yoo ဟာ တိုက်ခိုက်ရေး ၁၅ မျိုးကို ကျွမ်းကျင်တယ်လို့ ဆိုငြားလည်း ပက်ကွီအိုလို အကြမ်းပတမ်း တိုက်ခိုက်ရေးသမားနဲ့ နှိုင်းယှဉ်ရင် ပရော်ဖက်ရှင်နယ် အတွေ့အကြုံ မရှိပါဘူး။

Ref; ABS-CBN, AFP