တရုတ်နိုင်ငံ၏ မြင့်တက်လာသော လုပ်အားခနှင့် ကိုဗစ်လုံးဝကင်းစင်ရေးမူဝါဒများကြောင့် နိုင်ငံလွှမ်းမိုးနိုင်မှု တစ်စတစ်စလျော့ကျလာချိန်တွင် အဓိက ဂျပန်အထည်ချုပ်စက်ရုံများသည် တရုတ်ရှိ ပြည်ပလုပ်ငန်းများကို အရှေ့တောင်အာရှသို့ ရွှေ့ပြောင်းလျက်ရှိသည်။

ယန်းငွေတန်ဖိုးကျဆင်းခြင်းနှင့် ကုန်ကြမ်းစရိတ်များ မြင့်တက်လာချိန်တွင် အထည်ချုပ်ကုမ္ပဏီများသည် ကုန်ကျစရိတ်ကို လျှော့ချရန် ဖြစ်နိုင်သမျှနည်းလမ်းအားလုံးကို အသုံးပြုလျက်ရှိသည်။ အာရှ-ပစိဖိတ် ကုန်သွယ်ရေးသဘောတူညီချက်ဖြစ်သည့် ဒေသတွင်း ပြီးပြည့်စုံသော စီးပွားရေးပူးပေါင်းဆောင်ရွက်မှု (RCEP) သည် ဇန်နဝါရီလတွင် အသက်ဝင်ခဲ့ပြီး ကုမ္ပဏီများအား အခွင့်အလမ်းသစ်တစ်ရပ် ဖြစ်စေခဲ့သည်။

Adastria၊ Aoyama Trading နှင့် Uniqlo ကဲ့သို့သော အဓိကအဝတ်အထည်ကုမ္ပဏီများသည် အထည် အလိပ်သွင်းကုန်ခွန်များ လျှော့ချခြင်း သို့မဟုတ် ကင်းလွတ်ခွင့်ပြုခြင်းများကို အခွင့်ကောင်းယူကာ ထုတ်လုပ်မှုအခြေစိုက်ကုမ္ပဏီအချို့ကို အရှေ့တောင်အာရှရှိ RCEP အဖွဲ့ဝင်နိုင်ငံများသို့ ပြောင်းရွှေ့လျက်ရှိသည်။

ကုမ္ပဏီများသည် ၁၉၈၀ နှစ်များမှစ၍ ထုတ်လုပ်မှုများကို ဂျပန်မှ လုပ်အားခသက်သာသော တရုတ်နိုင်ငံသို့ စတင်ပြောင်းရွှေ့ခဲ့ကြသည်။ သို့သော် ၂၀၁၀ ဝန်းကျင်တွင် စီးပွားရေးဖွံ့ဖြိုးတိုးတက်လာကာ တရုတ်တွင် လုပ်အားခများ မြင့်တက်လာသဖြင့် China plus one မူဝါဒတစ်စိတ်တစ်ပိုင်းအဖြစ် အရှေ့တောင်အာရှသို့ တိုးချဲ့လာကြသည်။

တရုတ်နိုင်ငံ ကွမ်ကျိုးရှိ စက်ရုံအလုပ်သမားတစ်ဦး၏ ပျမ်းမျှလစာသည် အမေရိကန်ဒေါ်လာ ၆၇၀ ခန့်အထိ ရှိလာပြီး ဗီယက်နမ်နိုင်ငံ ဟိုချီမင်းမြို့၏လစာ အမေရိကန်ဒေါ်လာ ၂၇၀ ခန့်နှင့် ဘင်္ဂလားဒေ့ရှ်နိုင်ငံ ဒါကာ၏လစာ အမေရိကန်ဒေါ်လာ ၁၂၀ တို့ထက်များကြောင်း ဂျပန်ပြည်ပကုန်သွယ်ရေးအဖွဲ့က ပြောသည်။

ကိုရိုနာဗိုင်းရပ်စ်ပျံ့ပွားမှုကို တားဆီးရေးအတွက် အသွားအလာပိတ်ဆို့မှုအသည်းအသန်လုပ်ဆောင်သည့် တရုတ်၏ ကိုဗစ်လုံးဝကင်းစင်ရေးမူဝါဒက နိုင်ငံ၏ ထုတ်လုပ်မှုနှင့် ထောက်ပံ့ပို့ဆောင်ရေးကို အကြီးအကျယ် သက်ရောက်လျက်ရှိသည်။

ဂျပန်အထည်ချုပ်ကုမ္ပဏီများသည် ဝယ်လိုအားပြည့်မီရန် အခက်အခဲများတွေ့ရှိခဲ့ပြီး တရုတ်တွင် ထုတ်လုပ်မှုကို အလေးထားခြင်း၏အန္တရာယ်များကို သတိထားမိလာကြသည်။