တရုတ်နိုင်ငံတွင် နေ့စဉ် ကူးဗစ်အတည်ပြုလူနာသစ် အနည်းဆုံး ၁၀၀၀ ကျော်တွေ့ရှိနေသောကြောင့် တရုတ်ကွန်မြူနစ်ပါတီမှာ မနိုင်မနင်းဖြစ်လာကာ ကိုဗစ်လုံးဝကင်းစင်ရေးမူဝါဒမှာလည်း မအောင်မြင်တော့ပေ။ တရုတ်သမ္မတရှီကျင့်ဖျင်က အောက်တိုဘာလတွင် တတိယသမ္မတသက်တမ်းတာဝန်ရယူပြီးနောက် ကိုဗစ်မူဝါဒဖြေလျှော့ပေးလိမ့်မည်ဟု ပြည်သူများက မျှော်လင့်ခဲ့ကြသော်လည်း နေ့စဉ်ကူးစက်မှု အသစ်များ နှင့်အတူ ပြည်သူများမှာ အသွားအလာပိတ်ဆို့မှု ထပ်မံချမှတ်မည်ကို ကြောက်ရွံ့နေကြသည်ဟု Hong Kong Post က ဖော်ပြသည်။

နိုင်ငံက ကိုဗစ်ကူးစက်မှုအရေအတွက် ကျဆင်းအောင်မလုပ်ဆောင်နိုင်သောကြောင့် ပြည်သူများ၏ မကျေနပ်မှုများ နေ့စဉ်နှင့်အမျှ များပြားလာသည်။

တရုတ်နိုင်ငံတွင် ဆန္ဒပြမှုများ များပြားလာပြီး ပြည်သူများသည် တရုတ်၏ ပြင်းထန်သော အသွားအလာ ပိတ်ဆို့မှုနှင့် ကိုဗစ်လုံးဝကင်းစင်ရေးမူဝါဒကို သပိတ်မှောက်လာကြသည်။

ရှင်ကျန်းပြည်နယ် အူရမ်ကီမြို့မှ တိုက်ခန်းမီးလောင်မှုတွင် လူ ၁၀ ဦးသေဆုံးပြီးနောက် ဆန္ဒပြမှုများ စတင်ဖြစ်ပေါ်လာခြင်းဖြစ်သည်ဟု Hong Kong Post က ဖော်ပြသည်။

ကိုဗစ်လုံးဝကင်းစင်ရေးမူဝါဒသည် တရုတ်တွင် လူထောင်ပေါင်းများစွာကို လူမဆန်သောအခြေအနေသို့ ရောက်ရှိစေခဲ့ပြီး ပြည်သူများအကြား အကြောက်တရား၊ အမျက်ဒေါသနှင့် စိတ်ရှုပ်ထွေးစေခြင်းများကို ဖြစ်စေခဲ့သည်။

တရုတ်သမ္မတရှီကျင့်ဖျင်၏ မဖြစ်မနေလိုက်နာရမည့် ကိုဗစ်လုံးဝကင်းစင်ရေးမူဝါဒအရ မြို့ကြီးများနှင့် ဒေသများသည် တင်းကျပ်သော အသွားအလာပိတ်ဆို့မှုအောက်သို့ ကျရောက်ခဲ့ကာ ရောဂါကူးစက်ခံရပါက ပြည်သူများကို သီးခြားခွဲထားသည့်စင်တာများသို့ ပို့ဆောင်သည်။ ပေကျင်းအပါအဝင် မြို့ကြီးအားလုံးနီးပါးမှ ပြည်သူများ ကိုဗစ်စစ်ဆေးမှုကို မဖြစ်မနေ ခံယူရသည်။