ကရင်ပြည်နယ် ဘားအံမြို့နယ် နောင်လုံတိုးဂိတ်တွင် သေနတ်ပစ်ဖေါက်ကာ တိမ်းရှောင်သွားသူကို လိုက်လံစုံစမ်းဖေါ်ထုတ်ရာမှ ရွှေထည်ပစ္စည်း မျိုးစုံတို့ပါဝင်သည့် အလေးချိန် တစ်ပိဿာ ရွှေသားများနှင့် ငွေကျပ် သိန်း ၂၀၀ ကျော်ကို ဖမ်းဆီးမိသည်ဟု နိုင်ငံပိုင် သတင်းစာ ကြေးမုံတွင် မတ်လ ၄ ရက်က ဖေါ်ပြသည်။

နောင်လုံ တိုးဂိတ်တွင် ဖေဖေါ်ဝါရီ ၂၉ ရက်က သေနတ် ပစ်ဖေါက်ကာ တိမ်းရှောင်သွားခြင်းကြောင့် ရဲတပ်ဖွဲ့ဝင်တို့ လျှို့ဝှက် စုံစမ်းရာမှ ထိုသူသည် စောပုံးပုံဟု သိရှိရပြီး နောင်လုံ အနောက် ကျေးရွာအုပ်စု ရွှေလှိုင်ကျေးရွာတွင် ဖမ်းမိခဲ့ခြင်းဖြစ်သည်။

သူနှင့်အတူ လက်နက်ရှိနေသူ စောတင်သိန်း၊ ဦးစန်းညိုတို့ကို တွေ့ရှိရပြီး ယင်းတို့ထံမှ AK-47 တစ်လက်၊ M-16 သုံးလက်၊ M-41/A-1 လောင်ချာတွဲတစ်လက်နှင့် လက်နက်ပေါင်း ခုနှစ်မျိုးနှင့် ကျည်ဆံများ၊ ကာရီနား အဖြူရောင် ယာဉ်တစ်စီးတို့ကိုပါ ထိန်းသိမ်း ဖမ်းဆီးခဲ့သည်ဟုဆိုသည်။

စောပုံးပုံကို စစ်ဆေးချက်အရ ဘားအံမြို့နယ် မြပြည်သရက်တောကျေးရွာရှိ သူ၏နေအိမ်ကို ထပ်မံသွားရောက် စစ်ဆေးရာ နေအိမ်အတွင်း ရွှေထည်ပစ္စည်းမျိုးစုံ တစ်ပိဿာ သုံးကျပ်သား၊ မြန်မာငွေကျပ် ၂၂၂ သိန်း၊ ထိုင်းဘတ်ငွေ သုံးသိန်း တစ်သောင်းတို့ကိုလည်း သိမ်းဆည်းရမိသည်ဟု ဆိုသည်။

စောပုံးပုံ အပါအဝင် သုံးဦးကို လက်နက်ပုဒ်မဖြင့်လည်းကောင်း၊ မူးယစ်ဆေး ပုဒ်မဖြင့်လင်းကောင်း အိန္ဒူနယ်မြေ ရဲစန်းက အမှုဖွင့်ထားသည်။