တရုတ်နည်းပညာကုမ္ပဏီကြီး Alibaba နှင့် Baidu တို့သည် နယူးယော့ခ်တွင် ရှယ်ယာ ၁၂ ရာခိုင်နှုန်းကျော် ကျဆင်းသွားသည်။
တရုတ်၏ တင်းကျပ် သော ကိုရိုနာဗိုင်းရပ်စ်ကန့်သတ်ချက်များက တရုတ်စီးပွားရေးအား ကန့်သတ်မှု ဖြစ်စေ မည်ကို ရင်းနှီးမြုပ်နှံသူများက စိုးရိမ်လျက်ရှိသည်။
တရုတ်သည် စီးပွားရေးမြှင့်တင်မည့်စီမံချက်များနှင့် ကိုဗစ်လုံးဝကင်းစင်ရေးမူဝါဒများ အကြားတွင် လွန်ဆွဲလျက်ရှိသည်ဟု လေ့လာသုံးသပ်သူတစ်ဦးက ပြောသည်။
နည်းပညာကုမ္ပဏီကြီး Alibaba ၏ ရှယ်ယာများသည် အောက်တိုဘာ ၂၄ ရက်အစောပိုင်းတွင် ၅၂ ပတ်အတွင်း အနိမ့်ဆုံးသို့ရောက်ရှိပြီးနောက် နယူးယောက်စတော့အိတ်ချိန်းတွင် ၁၂ ဒသမ ၅ ရာခိုင်နှုန်းထိ ကျဆင်းသွား ခဲ့သည်။ အင်တာနက်ကုမ္ပဏီ Baidu သည် ၁၂ ဒသမ ၆ ရာခိုင်နှုန်း ဆုံးရှုံးခဲ့သလို အွန်လိုင်းစီးပွားရေးကုမ္ပဏီ Pinduoduo မှာလည်း ၂၅ ရာခိုင်နှုန်း နီးပါးကျဆင်းခဲ့သည်။
တရုတ်အာဏာရကွန်မြူနစ်ပါတီ၏ ၅ နှစ်တစ်ကြိမ်ကျင်းပသည့် ပါတီညီလာခံကို အောက်တိုဘာ ၂၃ ရက်က ပိတ်ပွဲအခမ်းအနားကျင်းပပြိးနောက် ရှယ်ယာကျဆင်းသွားခြင်းဖြစ်သည်။
ရှီသည် သမိုင်းဝင်တတိယမြောက်သက်တမ်းရယူခဲ့သည့် တစ်ပတ်ကြာကျင်းပသော ပါတီညီလာခံတွင် ကိုရိုနာဗိုင်းရပ်စ်ပျံ့နှံမှုနှေးကွေးစေသည့် တင်းကျပ်သော စည်းမျဉ်းများကို ဖြေလျှော့မည့်အချိန်ကို မပြောကြားခဲ့ပေ။
အောက်တိုဘာ ၂၄ ရက်က တရားဝင်ထုတ်ပြန်သောကိန်းဂဏန်းများအရ တရုတ်စီးပွားရေးသည် ဇူလိုင်နှင့်စက်တင်ဘာလကြားတွင်မျှော်လင့်ထားသည်ထက် ပိုမိုကောင်းမွန်သောနှုန်းဖြင့် တိုးတက်ခဲ့ သည်ကိုပြသသော်လည်း ဆက်လက်ဖြစ်ပွားနေသော ကိုဗစ်-၁၉ ကူးစက်မှုများနှင့် အိမ်ခြံမြေကဏ္ဍ အားနည်းချက်တို့ကြောင့် စားသုံးသူအင်အားနည်းနေဆဲဖြစ်ကာ အကျပ်အတည်းလက္ခဏာများရှိနေသေးကြောင်း ငွေကြေးဝန်ဆောင်မှုကုမ္ပဏီ HSBC မှ တရုတ် စီးပွားရေးပညာရှင် အဲရစ်ရှင်းက ပြောသည်။
