ရန်ကုန်၊ ဖေဖော်ဝါရီ ၂၉ ။ ။ ရခိုင်လက်နက်ကိုင်အဖွဲ့(AA) နှင့်ဆက်စပ်သူတစ်ဦး ဖမ်းမိပြီးနောက် မူးယစ်ဆေးဝါးရောင်းဝယ်ကာ လက်နက်ထောက်ပံ့သည်ဟု အစိုးရ၏ ထုတ်ပြန်ချက်ကို ရခိုင်အမျိုးသားအဖွဲ့ချုပ် /ရခိုင်တပ်မ တော် ULA/AA က ကန့်ကွက်ကြောင်းသိရသည်။
တာမွေမြို့နယ်တွင် Arakan Army (AA) အဖွဲ့မှ ဒုဗိုလ်မှူးကြီး အဆင့်ရှိ အောင်မြတ်ကျော် အား ဖမ်းမိပြီး နောက် မူးယစ်ဆေးဝါးရောင်းဝယ်မှု၊ လက်နက်/ခဲယမ်းများ တရားမဝင် ရောင်းဝယ်မှုများရှိ နေ ကြောင်း၊ ပါဝင်ပတ်သက်သူများအား ဆက်လက် စစ်ဆေးဖော်ထုတ်လျက်ရှိကြောင်း ပြည်ထဲရေး ဝန်ကြီးဌာနအား ကိုးကား၍ ပြန်ကြားရေးဝန်ကြီးဌာနက ဖေဖော်ဝါရီ ၂၉ရက်နေ့က သတင်း ထုတ်ပြန်ထားသည်။
ရခိုင်တပ်မတော်နှင့်ဆက်စပ်၍ဖမ်းမိသူများအား ပိုင်ရှင်မဲ့ မူးယစ်ဆေးဝါးများကိုထုတ်သုံးလျှက်အ တင်းအဓ္ဓမ နှိပ်စက်ဝန်ခံခိုင်းခြင်း၊ မူးယစ်ဆေးဝါးရောင်းသူများဖြစ်အောင် ဇာတ်လမ်းဆင်ပုံဖော်ခြင်း သာဖြစ်ပြီး တစ်ကမ္ဘာလုံးသိရှိထားသည့် အမှန်တရားမှာကား မူးယစ်ဆေးဝါးနှင့် ပတ်သက်၍ စိုက်ပျိုးခြင်း၊ ထုတ်လုပ်ခြင်း၊ ရောင်းဝယ်ခြင်း၊ ဖြန့်ဝေခြင်းများကိုပြုလုပ်နေကြသူများ မှာ “မြန်မာစစ်တပ်အုပ်စု သာဖြစ်သည်” ဟု ရခိုင်အမျိုးသားအဖွဲ့ချုပ်/ ရခိုင်တပ်မတော် သတင်းနှင့်ပြန်ကြားရေး က ပြန်လည်တုံပြန်သည်။
အခြေအမြစ်မရှိစွပ်စွဲ ရေးသားချက်များဟု ဆိုကာ အပြင်းအထန် ကန့်ကွက်ရှုတ်ချလိုက်ကာ ရခိုင်တပ်မတော်အပေါ် အမြစ်ပြုတ်ချေမှုန်းရေး လုပ်နေသော မြန်မာစစ်တပ်၏ ထိုးစစ်ဆင်တိုက်ခိုက် နေမှု အပေါ်တွင်လည်း အကောင်းဆုံးကို မျှော်လင့်သလို အဆိုးဆုံးအတွက်လည်း ပြင်ဆင်ထားပါကြောင်း သတင်းနှင့်ပြန်ကြားရေးရခိုင်အမျိုးသား အဖွဲ့ချုပ်/ ရခိုင်တပ်မတော်က အသိပေးလိုက်ခြင်းဖြစ်သည်ဟု ဆိုသည်။
ရန်ကုန်တိုင်းဒေသကြီး၊ တာမွေမြို့နယ်၊ တာမွေမြို့မရဲစခန်းမှ တပ်ဖွဲ့ဝင်များသည် ဖေဖော်ဝါရီ ၆ ရက် နံနက် ၂ နာရီ ၂၀ မိနစ်တွင် သက်သေများနှင့်အတူ လှည့်ကင်း ဆောင်ရွက်နေစဉ် နတ်မောက်ရပ်ကွက် ဦးထွန်းမြတ်လမ်း၊ Victor International School ရှေ့၌ မီးဖွင့်ပြီး စက်နှိုး ရပ်ထားသော Toyota Hilux Vigo ယာဉ်အား မသင်္ကာဖွယ်တွေ့ရှိသဖြင့် စစ်ဆေးရာ Austria နိုင်ငံလုပ် GNP-190 နံပါတ်ပါ 9MM သံကိုယ်ထည် အနက်ရောင် ပစ္စတို (၁)လက်နှင့် ဆက်စပ် ပစ္စည်း (၁၄)မျိုးအားတွေ့ရှိမှုဖြင့် Arakan Army(AA) အဖွဲ့မှ ဒုတိယဗိုလ်မှူးကြီးအဆင့်ရှိအောင်မြတ်ကျော်(ခ) ညီညီစိုး( ခ) မင်းခန့် (ခ) ညီညီ(၂၆) နှစ်အား လက်နက် အက်ဥပဒေဖြင့် အရေးယူခဲ့သည်။
ယင်းအပြင် အောင်မြတ်ကျော် ငှားရမ်းနေထိုင်သည့် မြောက်ဒဂုံရှိနေအိမ်၊မြောက်ဥက္ကာလာရှိနေအိမ်၊ လှိုင်သာယာရှိနေအိမ် တို့ကို စစ်ဆေးရာ မူးယစ်ဆေးဝါးနှင့် လက်နက်များဖမ်းဆီးမိသည့်အတွက် လက်နက်အက်ဥပဒေ၊မူးယစ်ဆေးဝါးနှင့်စိတ်ကိုပြောင်းလဲစေသော ပုဒ်မများဖြင့် အရေးယူထားကြောင်း ပြန်ကြားရေးက ထုတ်ပြန်ထားသည်။
