ယူကရိန်းနယ် ၄ ခုအား ရုရှားနိုင်ငံအတွင်းသို့ထည့်သွင်းရေးဆိုင်ရာ ဆန္ဒခံယူပွဲကို ရှုတ်ချသော အဆိုပြုချက်ကို ကုလသမဂ္ဂလုံခြုံရေးကောင်စီတွင် မဲခွဲဆုံးဖြတ်မှုအတွင်း တရုတ်နိုင်ငံက ကြားနေခဲ့မှုသည် ယူကရိန်းအပေါ် တရုတ်၏ လိမ်လည်လှည့်ဖျားသော ရပ်တည်ချက်ကို ထပ်မံပြသလိုက်ခြင်းပင်ဖြစ်သည်။

ကုလသမဂ္ဂဆိုင်ရာ တရုတ်သံအမတ်ကြီး ကျန်းဂျွန်က နိုင်ငံအားလုံး၏ အချုပ်အခြာအာဏာနှင့် နယ်မြေစိုးမိုးရေးကို ကာကွယ်စောင့်ရှောက်သင့်သလို နိုင်ငံများ၏ တရားဝင်လုံခြုံရေးဆိုင်ရာ စိုးရိမ်ပူပန်မှုများကိုလည်း အလေးအနက်ထားသင့်ကြောင်း ပြောကာ ရုရှားကို သွယ်ဝိုက်ထောက်ခံခဲ့သည်။

ထို့ပြင် တရုတ်အစိုးရ၏ ပြောရေးဆိုခွင့်ရှိသူ ဝမ်ဝေဘင်းက ကုလသမဂ္ဂ လုံခြုံရေးကောင်စီသည် ကုလသမဂ္ဂပဋိညာဉ်စာတမ်းတွင် ပြဋ္ဌာန်းထားသော ကြားဝင်ဖြန်ဖြေရေး ကိရိယာများကို အပြည့်အဝအသုံးပြုရန်နှင့် တိုက်ပွဲများ အဆုံးသတ်ရေးနှင့် တွေ့ဆုံဆွေးနွေးရေး လမ်းကြောင်းမှန်ပေါ်၌ အခြေအနေကို ထိန်းကျောင်းရန် လိုအပ်ကြောင်း ထပ်လောင်း ပြောကြားခဲ့သည်။

ရုရှားနှင့်ပေါင်းစည်းရေးဆိုင်ရာ ယူကရိန်းအရှေ့ပိုင်းနှင့်တောင်ပိုင်းတွင် ကျင်းပသော ဆန္ဒခံယူပွဲနှင့်ပတ်သက်ပြီး မကြာသေးမီက ကျင်းပခဲ့သည့် ကုလသမဂ္ဂ လုံခြုံရေးကောင်စီ အရေးပေါ်အစည်းအဝေးတွင် တရုတ်နိုင်ငံ၏ ရပ်တည်ချက်နှင့်စပ်လျဉ်း၍ ဝမ်ဝေဘင်းက ကုလသမဂ္ဂလုံခြုံရေးကောင်စီသည် နိုင်ငံရေးအရ ဖြေရှင်းရေး လမ်းဖွင့်ပေးရာတွင် အပြုသဘောဆောင်ပြီး တာဝန်ယူမှုရှိသော ဆောင်ရွက်ချက်များကို လုပ်ဆောင်ရန် လိုအပ်ကြောင်း ပြောကြားခဲ့သည်။

တရုတ်နိုင်ငံ အမျိုးသားပြည်သူ့ကွန်ဂရက် ဥက္ကဋ္ဌလီကျန်းရှုသည် ၂၀၂၂ ခုနှစ် စက်တင်ဘာလတွင် ရုရှားအောက်လွှတ်တော်မှ လက်ထောက်များနှင့် တွေ့ဆုံစဉ် ယူကရိန်းတွင် ရုရှား၏ အကျိုးစီးပွားကို ကာကွယ်ရန် ကြိုးပမ်းမှုများကို ထောက်ခံကြောင်း ထုတ်ဖော်ပြောဆိုခဲ့ပြီး ယူကရိန်းအပေါ် ရုရှား၏ အထူးစစ်ဆင်ရေးကို သိသိသာသာ ထောက်ခံလိုက်ခြင်းဖြစ်သည်။

တရုတ်-ယူကရိန်း ဆက်ဆံရေးသည် မကြာသေးမီက ခေတ္တရပ်တန့်သွားခဲ့ပုံပေါ်သည်။ နိုင်ငံကျောထောက် နောက်ခံပြု ကုန်စည်ပြပွဲဖြစ်သည့် စက်တင်ဘာ ၅ ရက်က ကျင်းပသော “ ဝန်ဆောင်မှုဆိုင်ရာ တရုတ်နိုင်ငံတကာကုန်စည်ပြပွဲ (CIFTIS)” သည် ပေကျင်းမြို့ရှိ ယူကရိန်းသံရုံးမှ စီစဉ်ကျင်းပမည့် ဖိုရမ်ကို ဖျက်သိမ်းခဲ့သည်။ အဆိုပါပွဲ၌ ယူကရိန်း သံတမန်များက ယူကရိန်းရှိ ကြီးမားသော ရင်းနှီးမြှုပ်နှံမှုအခွင့်အလမ်းများကို မြှင့်တင်ရန် စီစဉ်ထားခဲ့သည်။

ယူကရိန်းသမ္မတ ဇီလန်စကီးက ယူကရိန်းနှင့် တရုတ်အကြား ခေါင်းဆောင်အချင်းချင်း ဆက်သွယ်မှုသည် ယခင်ကထက် နည်းပါးကြောင်း မကြာသေးမီက မှတ်ချက်ပြုခဲ့သည်။

အများရှေ့တွင် လူကြားကောင်းအောင် ပြောဆိုနေပြီး နောက်ကွယ်မှ မီးမွှေးနေသော တရုတ်ကို ယူကရိန်းအနေဖြင့် သတိထားရမည်ဟု စစ်တမ်း၌ ဖော်ပြထားသည်။