အောက်တိုဘာလ ၇ ရက်
လက်ရှိ၌ ရုရှသည် ယူကရိန်း၏ အကြီးဆုံး လက်နက်ပေးပို့သည့် နိုင်ငံဖြစ်နေပြီး ယူကရိန်း တင့်ကားတပ်၏ ထက်ဝက်သည် ရုရှတို့ထံမှ သိမ်းဆည်းရမိခြင်း ဖြစ်ကြောင်း ပူတင်၏ အသက် ၇၀ မွေးနေ့တွင် ထုတ်ဖော်လာခဲ့သည်။
ခါကိဗ်တွင် ပြီးခဲ့သည့် လက ရုရှစစ်တပ်များကို ယူကရိန်းက အပြီးအပိုင် ချေမှုန်းလိုက်ခြင်းအားဖြင့် တင့်ကား ၄၀၀ ကျော်၊ သံချပ်ကာကား ၆၀၀ ခန့်နှင့် ဘက်စုံသုံး ဒုံးပစ်စနစ်များကို အသုံးပြုနိုင်ဆဲ သို့မဟုတ် ပြင်ဆင်အသုံးပြု၍ ရသည့် အနေအထားဖြင့် သိမ်းပိုက်ရရှိခဲ့သည်.
ထိုအတွက် ရုရှစစ်လက်နက်ပစ္စည်းများ အမြောက်အမြား သိမ်းပိုက်လိုက်နိုင်ခြင်းသည် ရုရှက ယူကရိန်းသို့ အများဆုံး လက်နက်ထောက်ပံ့နေသည်ဟုပင် ပြောဆိုနိုင်ပြီး အခြားသော မဟာမိတ်အားလုံး၏ ထောက်ပံ့ပေးမှုထက်ပင် ကျော်လွန်ကာ ရုရှထံမှ စစ်လက်နက်များ ယူကရိန်းက ရရှိခြင်းပင် ဖြစ်တော့သည်။
ယူကရိန်း တင့်ကားတပ်၏ ထက်ဝက်သည် စိတ်ဓာတ်ပျက်ပြားသော ရုရှစစ်သားများ ထားရစ်ခဲ့ကြသည့် တင့်ကားများ ဖြစ်နေဖွယ်ရှိသည်ဟု ဗြိတိန်စစ်ထောက်လှမ်းရေးက ယုံကြည်ထားသည်။
“ပြန်လည်ပြုပြင်ဖန်တီးသော သို့မဟုတ် သိမ်းဆည်းရရှိသော ရုရှစစ်လက်နက်များသည် ယူကရိန်း၏ စစ်လက်နက်အင်အား၏ အချိုးအစား တော်တော်များများကို လက်ရှိတွင် ဖြည့်ဆည်းပေးထားခြင်း ဖြစ်ကြောင်း” ယနေ့ နံနက်ပိုင်းက ကာကွယ်ရေးဝန်ကြီးဌာန၏ ထုတ်ပြန်ချက်တွင် ဆိုထားသည်။
“ကျူးကျော်စစ်ဖြစ်ချိန်ကစပြီး ယူကရိန်းဟာ ရုရှရဲ့ ပင်မတိုက်ခိုက်ရေးတင့်ကား အနည်းဆုံး ၄၄၀ နဲ့ အခြား သံချပ်ကာယာဉ် ၆၅၀ နီးပါးကို သိမ်းပိုက်ရရှိထားတယ်”ဟု ယင်း ထုတ်ပြန်ချက်၌ ဖော်ပြသည်။
“လက်ရှိ ယူကရိန်းရဲ့ တိုက်ပွဲဝင် တင့်ကား ထက်ဝက်ကျော်ဟာ သိမ်းဆည်းရမိတဲ့ ယာဉ်တွေနဲ့ စုဖွဲ့ထားတာ ဖြစ်နိုင်တယ်”ဟု ယင်းက ဆိုသည်။
“ရုရှစစ်သားတွေရဲ့ တပ်မဆုတ်ခင်နဲ့ အရှုံးမပေးခင် စစ်လက်နက်ပစ္စည်းတွေကို ဖျက်ဆီးပစ်ဖို့ ပျက်ကွက်ခဲ့တာဟာ လေ့ကျင့်သား မဝတာနဲ့ တိုက်ပွဲစည်းမျဉ်း လျော့ရဲတာတွေကို မီးမောင်းထိုး ပြသနေတယ်”ဟု ယင်း ထုတ်ပြန်ချက်တွင် ဆိုထားသည်။
“ပြင်းပြင်းထန်ထန် ဖိစီးမှုအောက်မှာ ဖွဲ့စည်းထားပြီး စစ်သားတွေ စိတ်ဓာတ် ပိုပျက်ပြားလာနေတာနဲ့အတူ ရုရှဟာ အကြီးစားစစ်လက်နက်တွေ ဆက်လက်ပြီး ဆုံးရှုံးဖို့ ရှိနေတယ်”ဟု ယင်းက ဆိုသည်။
ယူကရိန်းသည် ရုရှထံမှ ပင်မတိုက်ပွဲဝင် တင့်ကား စုစုပေါင်း ၄၂၁ စင်း သိမ်းဆည်းရမိခဲ့ကာ အခြား မဟာမိတ်အားလုံး ထောက်ပံ့ထားသော စင်းရေ ၃၂၀ ထက်ပင် ကျော်လွန်များပြားနေကြောင်း The Wall Street Journal မှ အကဲဖြတ်များက ပြောကြသည်။
သံချပ်ကာယာဉ်များ သိမ်းပိုက်ရရှိမှု စာရင်းသည် ပို၍ အရှက်ရစရာ ဖြစ်ပြီး ရုရှထံမှ ၄၄၅ စီး သိမ်းဆည်းရထားခြင်းကြောင့် မဟာမိတ်များ ထောက်ပံ့သည့် စီးရေ ၂၁၀ ထက် နှိုင်းယှဉ်နိုင်သည်။
HIMARS ကဲ့သို့သော ဘက်စုံသုံး လောင်ချာစနစ်နှင့် ပတ်သက်လျှင်မူ အနောက်အုပ်စု ထောက်ပံ့ထားသည်က ရုရှထံ သိမ်းပိုက်ရမိသည်ထက် သာလွန်သော်လည်း အနောက်အုပ်စု ထောက်ပံ့သည်က ၇၀ ခုဖြစ်ပြီး ရုရှထံမှ သိမ်းပိုက်နိုင်သည်က ၄၄ ခု ရှိထားသည်နှင့် နှိုင်းယှဉ်ကြည့်နိုင်မည် ဖြစ်သည်။
(မိုးသဲ ဘာသာပြန်သည်။)
