ကမ္ဘာ့ထိပ်ဆုံး ချန်ပီယံအဖြစ် တစ်ချိန်က ရှုမြင်ခံခဲ့ရသည့် တရုတ်နိုင်ငံသည်စီးပွားရေးပြန်လည်ဦးမော့လာရေး လမ်းကြောင်းတွင် ပြင်းထန်သော အတားအဆီးများနှင့် ရင်ဆိုင်ရနိုင်ပြီး အခြားနိုင်ငံအသီးသီးမှ ရင်းနှီး မြှုပ်နှံသူများက အခြားနိုင်ငံများကို ရှာဖွေနေခြင်းကြောင့် အထီးကျန်မှုကို ရင်ဆိုင်ရဖွယ်ရှိကြောင်း အိန္ဒိယတွင် အဆင့် ၁ နှင့် ကမ္ဘာ့ အဆင့် ၂ အချမ်းသာဆုံး စီးပွားရေးလုပ်ငန်းရှင်ကြီး ဂူတန်အဒါနီက ပြောကြားလိုက်သည်။
ကမ္ဘာ့ဒုတိယအကြီးဆုံးစီးပွားရေးဖြစ်သော တရုတ်တွင်ဖြစ်ပေါ်နေသည့်စိန်ခေါ်မှုများမှာ အမျိုးသားရေးဝါဒအား ကောင်းလာခြင်း၊ ကုန်ပစ္စည်းထုတ်လုပ်ဖြန့်ချိရေး လုပ်ငန်းစဉ်အခက်အခဲများကို ကိုင်တွယ်ရန် အားနည်းခြင်းနှင့် နည်းပညာကန့်သတ်ချက်များဖြစ်ကြောင်း အဒါနီကဖော်ပြထားသည်။
စင်္ကာပူတွင်ကျင်းပသည့်၂၀ကြိမ်မြောက် Forbes မဂ္ဂဇင်း၏ကမ္ဘာလုံးဆိုင်ရာအမှုဆောင်အရာရှိချုပ်များ ကွန်ဖရင့်တွင် ပြောကြားသည့် မိန့်ခွန်းအတွင်း အဒါနီက ယခုကဲ့သို့မှတ်ချက်ပေးခဲ့ခြင်းဖြစ်သည်။
တရုတ်၏အိမ်ရာနှင့်အကြွေးအန္တရာယ်ကိုကိုးကားပြီး ၁၉၉၀ပြည့်လွန်နှစ်များဆယ်စုနှစ်များက ဂျပန်၏ စီးပွားရေးမအောင်မမြင်ဖြစ်ခဲ့သည့် နှစ်များကို ကိုးကားပြောကြားခဲ့သည်။
စီးပွားရေးများအားလုံးအချိန်ကြာလာသည်နှင့်အမျှပြန်ကောင်းလာရန်မျှော်လင့်နေချိန်တွင် "အပြန်အလှန် ပွတ်တိုက်မှုများ ကယခုတစ်ကြိမ်တွင်တရုတ်အတွက်ပိုမိုခက်ခဲပုံပေါ်ကြောင်း" ၎င်းကပြောကြားခဲ့သည်။
မိနစ်၃၀နီးပါးကြာမိန့်ခွန်းတွင် အဒါနီက အိန္ဒိယ၏ စီးပွားရေးအလားအလာများအကြောင်းလည်း ပြောကြားခဲ့သည်။
အိန္ဒိယအကြောင်းပြောပါက စီးပွားရေးကမပြည့်စုံသေးသော်လည်း နိုင်ငံတွင် ဒီမိုကရေစီ အနှစ်သာရ ရှိနေကြောင်း ၎င်းကပြောကြားခဲ့သည်။
မကြာသေးမီကAmazon အမှုဆောင်အရာရှိချုပ်ဂျက်ဘော့စ်ကိုကျော်ပြီး ကမ္ဘာ့ဒုတိယ အချမ်းသာဆုံး ပုဂ္ဂိုလ်ဖြစ်လာသည့် အဒါနီက အိန္ဒိယသည် ကမ္ဘာ့ပဉ္စမအကြီးဆုံးစီးပွားရေး မကြာသေးမီကဖြစ်လာပြီး၂၀၃၀ပြည့်နှစ်တွင် ကမ္ဘာ့တတိယအကြီးဆုံး စီးပွားရေးဖြစ်လာရန် အလားအလာရှိကြောင်းထောက်ပြခဲ့သည်။
