တိုကျို၊ ဖေဖော်ဝါရီ ၂၅ ။           ။ ဘရာဇီးသို့ သွားရောက်လည်ပတ်ခဲ့သည့် တိုကျိုမြို့အနီး နေထိုင်သူ ဆယ်ကျော်သက်တစ်ဦးတွင် ဇီကာပိုးကူးစက်ခံရသည်ကို တွေ့ရှိပြီး ပြီးခဲ့သည့်နှစ် မေလမှစကာ လက်တင်အမေရိကတွင် ဇီကာပိုးပျံ့နှံ့သည့် အချိန်နောက်ပိုင်း ဂျပန်တွင် ပထမဆုံးအဖြစ် စတင်တွေ့ရှိလာခြင်းဖြစ်ကြောင်း ဂျပန်ရုပ်သံလွှင့်ဌာန NHK က ဖေဖော်ဝါရီ ၂၅ ရက်တွင် သတင်းထုတ်လွှင့်သည်။

မြို့တော် တိုကျိုအနောက်တောင်ပိုင်း ကာနာဂါဝါစီရင်စုအတွင်း နေထိုင်သူ ဇီကာပိုးတွေ့ရှိသူ ဆယ်ကျော်သက်ယောက်ကျားလေးသည် ဘရာဇီးမှ ဂျပန်သို့ ပြန်ရောက်ချိန် ကိုယ်အပူချိန်တက်ကာ ဖျားနာခြင်းဖြစ်ကြောင်း ကျန်းမာရေးဝန်ကြီးဌာနက ပြောသည်ဟု ကိုးကားလျက် NHK က ဖော်ပြသည်။

အဆိုပါ NHK ၏ သတင်းနှင့် ပတ်သက်ပြီး ချက်ချင်းထင်မြင်ချက်မပေးနိုင်ကြောင်း ကျန်းမာရေးဝန်ကြီးဌာန တာဝန်ရှိသူများဆိုသည်။

လွန်ခဲ့သည့် သုံးနှစ်ခန့်အချိန်ကလည်း နိုင်ငံခြားက ပြန်လာသည့် ဂျပန်သုံးဦးတွင် ဇီကာပိုးတွေ့ရှိသည်ဟူသော သတင်းကို NHK ကပင် ဖော်ပြခဲ့ဖူးသည်။

ဇီကာရောဂါသည် အမှန်တကယ် ဦးခေါင်းပုံမှန်မဟုတ်သေးကျုံ့ပြီး မွေးရာပါ ဦးနှောက်ဖွံ့ဖြိုးမှု မပြည့်စုံစေမှုကို ဖြစ်ပေါ်စေသည်ဆိုသော အချက်အပါအဝင် ဇီကာနှင့် ပတ်သက်ပြီး မသိရသည့်အချက်များမှာ များစွာရှိနေဆဲဖြစ်သည်။