အိန္ဒိယနှင့် ဂျပန်တို့သည် ဘင်္ဂလားပင်လယ်အော်အတွင်း၌ JIMEX အမည်ပေးထားသည့် ပူးပေါင်းရေတပ် စစ်ရေးလေ့ကျင့်မှုတစ်ခုကို ပြုလုပ်နေသလို နိုင်ငံစုံပါဝင်သည့် Kakadu စစ်ရေးလေ့ကျင့်မှုအတွက်လည်း အိန္ဒိယ၏ စစ်သင်္ဘောတစ်စင်းနှင့် ပင်လယ်ပြင် ကင်းလှည့်ရေယာဉ်တို့သည် ဩစတြေးလျသို့ ရောက်ရှိနေပြီ ဖြစ်သည်။
အဆိုပါ စစ်ရေးလေ့ကျင့်မှုများသည် အိန္ဒိယအနေဖြင့် Quad အဖွဲ့ဝင် ၂ နိုင်ငံဖြစ်သည့် ဂျပန်၊ ဩစတြေးလျတို့ နှင့် ကာကွယ်ရေးဆိုင်ရာ ပူးပေါင်းဆောင်ရွက်မှုကို တိုးမြှင့်လုပ်ဆောင်နေကြောင်းကို အသိပေးခြင်း ဖြစ်သည်။ ထို့ပြင် အိန္ဒိယအနေဖြင့် အမေရိကန်နှင့် စစ်ရေးလေ့ကျင်မှုကို နှစ်စဉ် လုပ်ဆောင်လျက်ရှိသည်။
ယခုပြုလုပ်နေသည့် ၆ ကြိမ်မြောက် JIMEX စစ်ရေးလေ့ကျင့်မှုတွင် ဂျပန်စစ်တပ်က ရဟတ်ယာဉ်တင်သင်္ဘော Izumo နှင့် ပဲ့ထိန်းဒုံးကျည်တပ် ဖျက်သင်္ဘော Takanami တို့ ပါဝင်ခဲ့သည်။
အိန္ဒိယကလည်း ဘက်စုံသုံး ရေဒါပျောက် ဖရီးဂိတ်စစ်သင်္ဘော INS Sahyadri နှင့် ရေငုပ်သင်္ဘောဖျက် အမြန်ရေယာဉ်များဖြစ်သည့် INS Kadmatt နှင့် INS Kavaratti MiG-29K ဂျက်လေယာဉ်များ၊ ရဟတ်ယာဉ်များနျင့် ကင်းလှည့် ရေယာဉ်များ ပါဝင်ခဲ့ကြသည်။
“ဂျပန် သင်္ဘောတွေကိုတော့ Escort Flotilla Four ၏ တပ်မှူး ရေတပ်ဗိုလ်ချုပ်ကြီး ဟီရာတာတိုရှိယူခီက ဦးဆောင်ခဲ့သလို အိန္ဒိယ၏ အရှေ့ပိုင်း သင်္ဘောတပ်ဖွဲ့ကို ရေတပ်ဗိုလ်ချုပ်ကြီး ဆန်ဂျေးဘာလာက ဦးဆောင်ခဲ့တယ်” ဟု အရာရှိတစ်ဦးက ပြောကြားသည်။
ထို့ပြင် အိန္ဒိယ၏ ရေဒါပျောက် ဖရီးဂိတ် စစ်သင်္ဘော INS Satpura နှင့် ခရီးရှည်သွား P-8I ပင်လယ်ပြင် ကင်းလှည့်လေယာဉ်တို့သည် ဩစတြေးလျက အိမ်ရှင်အဖြစ် လက်ခံကျင်းပသည့် ၂ ပတ်ကြာ Kakadu စစ်ရေးလေ့ကျင့်မှုတွင် ပါဝင်ရန် ယခုအခါ ဒါဝင်မြို့သို့ ရောက်ရှိနေပြီ ဖြစ်သည်။