တရုတ်သည် လနမူနာများတွင် စွမ်းအင်ရင်းမြစ်အဖြစ် အသုံးပြုနိုင်သည့် ဓာတ်သတ္တုတစ်မျိုးကို ရှာ ဖွေတွေ့ရှိပြီးနောက် လကမ္ဘာသို့ ခရီးစဉ် ၃ ခုကို သွားရောက်ရန်   စီစဉ်လျက်ရှိသည်။
 
တရုတ်အမျိုးသားအာကာသစီမံခန့်ခွဲရေးအဖွဲ့က အာကာသအစီအစဉ် အရှိန်မြှင့်တင်မှု တစ်စိတ်တစ်ပိုင်း အနေဖြင့် လာမည့်ဆယ်စုနှစ်အတွင်း လူလိုက်ပါခြင်းမရှိသော လစူးစမ်းရေးယာဉ် ၃ စင်းကို လွှတ်တင် သွားမည်ဖြစ်ကြောင်း သီတင်းပတ်ကုန်က ကြေညာခဲ့သည်။ 

တရုတ်နိုင်ငံပိုင် အာကာသအေဂျင်စီသည် တန်ဖိုးကြီး လပေါ်မှ သယံဇာတအဖြစ် သက်သေပြနိုင်သည့် ဟီလီယမ်-၃ ပါဝင်သော ဖော့စဖိတ် ဓာတ်သတ္တု Changesite-(Y) ကို ရှာဖွေတွေ့ရှိကြောင်း ကြေညာပြီးနောက် တစ်ရက်အကြာတွင် အဆိုပါ ကြေညာချက်ကို ထုတ်ပြန်ခဲ့ခြင်းဖြစ်သည်။

Changesite-(Y) သည် လပေါ်၌ လူသားများတွေ့ရှိသည့် ဆဋ္ဌမမြောက် သတ္တုသစ်ဖြစ်ပြီး အမေရိကန်နှင့် ရုရှားတို့တွေ့ရှိပြီးနောက် တရုတ်က တတိယမြောက်တွေ့ရှိသည့်နိုင်ငံဖြစ်လာသည်။

လမျက်နှာပြင်မှ ကျောက်တုံးများနှင့်ဖုန်မှုန့်များကို ယူဆောင်ခဲ့သည် ၂၀၂၀ ခုနှစ်က လွှတ်တင်ခဲ့သော Chang-e-5 လမစ်ရှင်မှ Changesite-(Y)ဓာတ်သတ္တုကို တွေ့ရှိခဲ့ခြင်းဖြစ်သည်။

လမျက်နှာပြင်သို့ လူသားများ ရောက်ရှိရန်ဟူသော နာဆာ၏ရည်ရွယ်ချက်နှင့်အပြိုင် တရုတ်ကလည်း ရည်မှန်းချက်ကြီးမားသော အာကာသအစီအစဉ်များရှိပြီးဖြစ်သည်။

ပြီးခဲ့သည့် သီတင်းပတ်က တရုတ်အာကာသသိပ္ပံနှင့် နည်းပညာကော်ပိုရေးရှင်း (CASC) သည် အနာဂတ် လကမ္ဘာနှင့် အင်္ဂါဂြိုဟ် မစ်ရှင်များအတွက် အသုံးပြုမည့် ဒုံးပျံအင်ဂျင်အသစ်ကို မြေပြင်စမ်းသပ်မှု တစ်ခုပြုလုပ်ခဲ့ပြီး "ပြီးပြည့်စုံသော အောင်မြင်မှု" ဖြစ်ကြောင်း ဖော်ပြခဲ့သည်။