အမေရိကန်နှင့် သြစတြေးလျတို့ ဦးဆောင်သည့် နိုင်ငံစုံလေတပ်များပါဝင်သော အကြီးစားစစ်ရေးလေ့ကျင့်မှုကို သြစတြေးလျ မြောက်ပိုင်း၌ ပြုလုပ်ရာတွင် ဂျာမနီကလည်း ပထမဆုံးအကြိမ်အဖြစ်ပါဝင်ခဲ့ရာတွင် ယင်း စစ်ဆင်ရေးသည် အာရှရှိ လုံခြုံရေးစိန်ခေါ်မှုများအတွက် ဥရောပ၏ ကြီးမားသော တုံ့ပြန်မှုအဖြစ် လေ့လာ သုံးသပ်သူတစ်ဦးက အဓိပ္ပါယ်ဖွင့်ဆိုလိုက်သည်။

အလားတူပင် အမေရိကန် အောက်လွှတ်တော်ဥက္ကဋ္ဌ နန်စီပလိုစီ၏ ထိုင်ဝမ်ခရီးစဉ်အပြီး ဒေသတွင်း၌ တင်းမာမှုများ ဆက်လက်မြင့်မားနေနေချိန်တွင် အမေရိကန်နှင့် တောင်ကိုရီးယားတို့သည် ၄ နှစ်အတွင်း အကြီးမားဆုံး ပူးတွဲစစ်ရေးလေ့ကျင့်မှုကို ဩဂုတ် ၂၂ ရက်တွင် စတင်ခဲ့သည်။

၁၉၈၁ ခုနှစ်နောက်ပိုင်း ၂ နှစ် တစ်ကြိမ်ကျင်းပခဲ့ပြီး ကိုဗစ်-၁၉ ကပ်ရောဂါကြောင့် ၄ နှစ်မျှ ရပ်နားခဲ့သော Exercise Pitch Black ခေါ် စစ်ရေးလေ့ကျင့်မှုသည် ခါတိုင်းထက် နိုင်ငံများပါ ပိုမိုပါဝင်လာကာ ပြန်လည် ကျင်းပခြင်းဖြစ်သည်။

နိုင်ငံပေါင်း ၁၇ နိုင်ငံပါဝင်သည့် စစ်ရေးလေ့ကျင့်မှုတွင် ဂျာမနီ၊ ဂျပန်နှင့် တောင်ကိုရီးယားတို့သည် ပထမဆုံး အကြိမ်အဖြစ် ပါဝင်ကြခြင်းဖြစ်သည်။ ၎င်းနိုင်ငံများသည် ဩဂုတ် ၁၉ ရက်မှ စက်တင်ဘာ ၈ ရက်အထိ ကျင်းပ မည့် စစ်ရေးလေ့ကျင့်မှုများတွင် လေယာဉ်အစင်းပေါင်း ၁၀၀ နှင့် တပ်ဖွဲ့ဝင် ၂၅၀၀ တို့ကို စေလွှတ်သွားမည် ဖြစ်သည်။

Exercise Pitch Black စစ်ရေးလေ့ကျင့်မှုသည် နိုင်ငံများ အပြန်အလှန်ပူးပေါင်း လုပ်ဆောင်နိုင်မှုနှင့် နားလည်မှု အားဖြင့် ဒေသတွင်း လုံခြုံရေးကို မြှင့်တင်ရန် ရည်ရွယ်ထားကြောင်း ဩစတြေးလျတော်ဝင် လေတပ်(RAAF) ၏ ထုတ်ပြန်ချက်တွင် ဖော်ပြထားသည်။

တရုတ်က အင်ဒို-ပစိဖိတ်ဒေသတွင် အမေရိကန်ဦးဆောင်သော လုံခြုံရေးဆိုင်ရာအစပျိုးမှုများနှင့် လုပ်ဆောင်ချက် များကို ကြိမ်ဖန်များစွာ ဝေဖန်ခဲ့ပြီး အာရှအသွင် NATO တပ်ဖွဲ့ ကိုပုံဖော်ရန် အနောက ်နိုင်ငံများ၏ ကြိုးပမ်းမှုများအဖြစ် ခေါ်ဝေါ်ခဲ့သည်။

Exercise Pitch Black စစ်ရေးလေ့ကျင့်မှုသည် တရုတ်ဆန့်ကျင်ရေးတပ်ပေါင်းစုထဲသို့ နိုင်ငံများကို ထပ်မံဆွဲထည့်ခြင်းဖြစ်ပြီး ထိုင်ဝမ်အရေးနှင့်ပတ်သက်ပြီး တရုတ်ကို ဖိအားပေးရန် အနောက်နိုင်ငံများ၏ စည်းလုံးညီညွတ်မှုကို ပြသခြင်းဖြစ်သည်ဟု တရုတ်နိုင်ငံပိုင်မီဒီယာက ဖော်ပြခဲ့သည်။