တရုတ်အင်တာနက်သုံးစွဲသူများသည် အချိန်နှောင်းမှ ပြည်တွင်းဖြစ်ကာကွယ်ဆေးများထိုးကြသည့် ဗဟိုနှင့်ပြည်နယ်အစိုးရခေါင်းဆောင်များအား မေးခွန်းထုတ်လိုက်ကြပြီး ကာကွယ်ဆေးများ၏ ထိရောက်မှုအပေါ်လည်း သံသယရှိနေကြသည်ဟု Asian Lite International သတင်းကဖော်ပြသည်။

တရုတ်ခေါင်းဆောင်များအားလုံးသည် ပြည်တွင်းမှ ထုတ်လုပ်သော ကိုဗစ်-၁၉ ကာကွယ်ဆေးများ ထိုးပြီး ပြီဖြစ်ကြောင်း တရုတ်အမျိုးသားကျန်းမာရေးကော်မရှင်က ၎င်း၏ Weibo အကောင့်တွင် တင်ပြီးနောက် တရုတ်မှအင်တာနက်သုံးစွဲသူများက မှတ်ချက်များပြုလာခြင်းဖြစ်သည်။

အင်တာနက်သုံးစွဲသူများ၏ဝေဖန်မှုကြောင့် ကျန်းမာရေးကော်မရှင်၏ Weibo ပို့စ်ရှိမှတ်ချက်ကဏ္ဍကို ပိတ်ပစ်ခဲ့ရသည်။ အမျိုးသားကျန်းမာရေးဌာန၏ ထုတ်ပြန်ချက်သည် မကြာသေးခင်ကဖြစ်ပွားခဲ့သော ကိုဗစ်-၁၉ လှိုင်းကျရောက်မှုအပြီး ပြည်တွင်းထုတ် ကာကွယ်ဆေးများ၏ ထိရောက်မှုနှင့် ဘေးကင်းလုံခြုံမှုအပေါ် ပြည်သူများ၏စိုးရိမ်မှုကို ဖြေသိမ့်ရန် ရည်ရွယ်ခြင်းဖြစ်သည်။

ယခုအခါ ပေကျင်းအစိုးရသည် ပြင်းထန်သော ကိုဗစ်-၁၉ ရောဂါဖြစ်ပွားမှုကို တပ်လှန့်သတိပေးထားကြောင်း Asian Lite International က ဖော်ပြသည်။

ကာကွယ်ဆေးမထိရောက်မှုကြောင့် တရုတ်နိုင်ငံ ဒုက္ခအကြီး အကျယ်တွေ့နေစဉ်မှာ အိန္ဒိယသည် အောင်မြင်သောကိုဗစ်-၁၉ ကာကွယ်ဆေးကြောင့် ပုံမှန်အခြေအနေ ရောက်ရှိနေပြီဖြစ်သည်။

တရုတ်နှင့်အိန္ဒိယသည် ကိုဗစ်-၁၉ ကာကွယ်ဆေးကို အပြိုင်အဆိုင် ထုတ်လုပ်ခဲ့ကြသည်။ တရုတ်သည် ကိုဗစ်-၁၉ ကာကွယ်ဆေးကို ပထမဆုံးထုတ်လုပ်နိုင်ခဲ့သော်လည်း အိန္ဒိယသည် ၎င်းနိုင်ငံသားများကို အသွားအလာ ပိတ်ဆို့မှုနှင့်တခြားကန့်သတ်ချက်များမှ  ဖြေလျှော့ပေးနိုင်ပြီဖြစ်သဖြင့် ကာကွယ်ဆေးအောင်မြင်ကြောင်း သက်သေပြခဲ့သည်။

တရုတ်ကာကွယ်ဆေးများ၏ ထိရောက်မှုမှာ ၆၀ ရာခိုင်နှုန်းသာရှိကြောင်း ဟောင်ကောင်တက္ကသိုလ်၏ လေ့လာမှုတစ်ရပ်၌ ဖော်ပြထားသည်။ Sinovac ကာကွယ်ဆေးထုတ်သူများသည် ဂျာမန်ထုတ် Pfizer-BioNTech ကာကွယ်ဆေးထိုးသူများနှင့်နှိုင်းယှဉ်ပါက သေဆုံးနိုင်ခြေ ၃ ဆ ပိုများကြောင်းလည်း ထပ်မံတွေ့ရှိခဲ့သည်။

တရုတ်ကာကွယ်ဆေးများသည် အိုမီခရွန်မျိုးကွဲများကိုလည်း ကာကွယ်နိုင်စွမ်းမရှိကြောင်း The Lancet Infectious Diseases ဂျာနယ်၌ ဖော်ပြသော လေ့လာမှုတစ်ရပ်၌ ဖော်ပြထားသည်။

တရုတ်အာဏာပိုင်များသည် ရောဂါကူးစက်မှုကို လျှော့ချနိုင်ရန် အငြင်းပွားဖွယ် ကိုဗစ်လုံးဝကင်းစင်ရေးမူဝါဒ အပါအဝင် ဖြစ်နိုင်သမျှနည်းလမ်းများဖြင့် ကြိုးစားခဲ့သော်လည်း အချည်းအနှီးသာဖြစ်ခဲ့ပြီး ရောဂါဖြစ်ပွားမှု နှုန်းများ မြင့်တက်လာကာ တရုတ်နိုင်ငံအတွင်း ပုံမှန်နေထိုင်မှုဘဝအပေါ် အနှောက်အယှက်ဖြစ်စေခဲ့သည်။