ဇူလိုင်လ ၂၃ ရက်
စစ်ကိုင်းတိုင်း၊ ယင်းမာပင်ခရိုင်ရှိ ကျေးရွာတစ်ရွာတွင် အမျိုးသားညီညွတ်ရေးအစိုးရ (NUG) ပညာရေးဝန်ကြီးဌာန၏ လမ်းညွှန်ချက်ဖြင့် ကြားကာလပညာသင်နှစ် မိုးရာသီအားကစားပြိုင်ပွဲကို ဇူလိုင် ၂၂ ရက်နေ့၌ပြုလုပ်ခဲ့သည်။
အားကစားပြိုင်ပွဲတွင် ဘောလုံး၊ ဘော်လီဘောပြိုင်ပွဲအပါအဝင် အားကစားနည်း ၁၃ မျိုးအား ကျောင်းသား၊ ကျောင်းသူများက ဝင်ရောက်ယှဉ်ပြိုင်ခဲ့ကြောင်းဆိုသည်။
ယင်းစာသင်ကျောင်းတွင် ဆရာ၊ ဆရာမ ဦးရေ ၃၀ က မူလတန်းမှ အလယ်တန်းအဆင့်ထိ ကျောင်းသားကျောင်းသူ ဦးရေ၂၆၀ ခန့်အား ပညာသင်ကြားပေးလျက်ရှိသည်။
“ စစ်ကျွန်ပညာရေးကို လုံးဝအလိုမရှိဘူး။ အခုလိုအချိန်မျိုးမှာ ကလေးငယ်များ မလေလွင့်စေဖို့နဲ့ ပညာတတ်မြောက်ဖို့အတွက် အခုလိုစာသင်ကျောင်းများကို ဖွင့်လှစ်ပေးရခြင်းဖြစ်ပါတယ်” ဟု ဒေသခံတစ်ဦးက ပြောသည်။
NUG အစိုးရလက်အောက်ခံ ပညာရေးဝန်ကြီးဌာန၏ လမ်းညွှန်ချက်အရ ပညာသင်ပေးနေသည်မှာ ၁၀ လခန့်ရှိပြီဖြစ်ကာ ဆရာ၊ ဆရာမ ထပ်မံရရှိပါက အထက်တန်းအထိ တိုးချဲ့သင်ကြားသွားရန် အစီအစဉ်ရှိကြောင်းသိရသည်။