လူများစုဝေးခြင်းကို တားဆီးရန် ကိုဗစ်-၁၉ ခြေရာခံအက်ပ်ပလီကေးရှင်းကို အသုံးပြုခဲ့သဖြင့် အစောပိုင်းက အာရုံစူးစိုက်မှုခံခဲ့ရပြီးနောက် တရုတ်တွင် ဘဏ်ငွေအပ်နှံထားသည့် ဒေါသထွက်နေသည့် လူအုပ်ကြီးက ဇူလိုင်လ ၉ ရက် ရဲများနှင့် ရင်ဆိုင်ခဲ့ပြီး အချို့မှာ အဝေးသို့ခေါ်ဆောင်သွားစဉ် ရိုက်နှက်ခံခဲ့ရသည်။
ပေကျင်းမြို့အနောက်တောင်ဘက် ၆၂၀ ကီလိုမီတာ (၃၈၀ မိုင်) ခန့်အကွာ ဟိုင်နန်ပြည်နယ်ကျန်ကျိုးမြို့ရှိ တရုတ်နိုင်ငံတော်ဗဟိုဘဏ်၏ ဘဏ်ခွဲတစ်ခု၏ အဝင်ဝတွင် လူရာပေါင်းများစွာက ဆိုင်းဘုတ်များ ကိုင် ဆောင်ကာ ကြွေးကြော်သံများ ဟစ်ကြွေးခဲ့ကြသည်။
ဆန္ဒပြသူတစ်ဦးက ရိုက်ကူးထားသည့် ဗီဒီယိုတွင် အရပ်ဝတ်လုံခြုံရေးတပ်ဖွဲ့များက လူစုလူဝေးအား ထိန်းသိမ်း နေစဉ် ရေသန့်ဘူးများနှင့် အခြားပစ္စည်းများဖြင့် ပစ်ပေါက်ခံနေရသည်ကို တွေ့မြင်ရသည်။
ဆန္ဒပြသူများသည် ဟိုင်နန်နှင့် အိမ်နီးချင်းအန်ဟွေးပြည်နယ်ရှိ ကျေးလက်ဘဏ် ၆ ခုတွင် ဘဏ်စာရင်း ဖွင့်ထားသည့် ထောင်ပေါင်းများစွာသော ငွေအပ်နှံထားများထဲမှ ဖြစ်သည်။
ဘဏ်များ၏ မိခင်ကုမ္ပဏီအကြီးအကဲဖြစ်သူသည် ထွက်ပြေးသွားပြီး ငွေကြေးဆိုင်ရာ ရာဇဝတ်မှုများအတွက် အလိုရှိနေကြောင်း မီဒီယာများက ဖော်ပြပြီးနောက်တွင် ၎င်းတို့၏ အပ်နှံငွေများကို မထုတ်ယူနိုင်တော့ကြောင်း ၎င်းတို့ တွေ့ရှိခဲ့ရသည်။
“ကျွန်မတို့ ဒီနေ့လာတာက စုဆောင်းထားတဲ့ငွေတွေကို ပြန်လိုချင်လို့ပါ။ အိမ်မှာ သက်ကြီးရွယ်အိုတွေနဲ့ ကလေးတွေ ရှိတာကြောင့် စုဆောင်းငွေ မထုတ်ယူနိုင်တာက ဘဝကို ဆိုးဆိုးရွားရွား ထိခိုက်စေခဲ့ပါတယ်” ဟု အရေးယူခံရမည်ကို စိုးရိမ်သဖြင့် နာမည်မဖော်လိုသည့် နောက်ဆုံးအမည်ကျန်းအမည်ရှိ ရှန်တုံပြည်နယ်မှ အမျိုးသမီးတစ်ဦးက ပြောကြားခဲ့သည်။
ကိုဗစ်-၁၉ ခြေရာခံအက်ပ်ကို အလွဲသုံးစားလုပ်ခြင်းကြောင့် ဇွန်လက ဒေသတွင်းအရှုပ်တော်ပုံမှ နိုင်ငံကျော်ဖြစ်ရပ်တစ်ခုဖြစ်လာခဲ့သည်။
အရေးယူဆောင်ရွက်ပေးရေးအတွက် ကျန်ကျိုးမြို့ရှိ စည်းကမ်းထိန်းသိမ်းရေးအဖွဲ့များအား တောင်းဆိုရန် လာရောက်သူ အများအပြားသည် အက်ပ်ပလီကေးရှင်းတွင် ၎င်းတို့၏ ကျန်းမာရေးအခြေအနေ အနီရောင်ပြောင်းသွားကာ ခရီးသွားခြင်းမှ တားမြစ်ခံရကြောင်း တွေ့ရှိခဲ့ကြသည်။
