ပါကစ္စတန်၏ ငွေကြေးဖောင်းပွမှုနှုန်းက ဇွန်လတွင် ၂၁ ဒသမ ၃၂ ရာခိုင်နှုန်းအထိ မြင့်တက်ခဲ့ရာ ၁၃ နှစ်ကျော်အတွင်း အမြင့်ဆုံး ဖြစ်ကြောင်း Dawn သတင်းစာက ဇူလိုင် ၁ ရက်တွင် ဖော်ပြသည်။

စားသုံးသူ ဈေးဆနှုန်း (CPI) ဖြင့် တိုင်းတာသည့် ငွေကြေးဖောင်းပွမှုနှုန်းသည် ပြီးခဲ့သည့် မေလက ၁၃ ဒသမ ၇၆ ရာခိုင်နှုန်း ဖြစ်ကြောင်း ပါကစ္စတန်၏ စာရင်းအင်း ဗျူရို (PBS) က ထုတ်ပြန်ခဲ့သည်။

ငွေကြေးဖောင်းပွမှုနှုန်းသည် တစ်လထက်တစ်လ ၆ ဒသမ ၃၄ ရာခိုင်နှုန်း မြင့်တက်ခဲ့ပြီး ဇွန်လတွင် တစ်နှစ်ထက် တစ်နှစ် ၂၁ ဒသမ ၃၂ ရာခိုင်နှုန်းကို ရောက်ရှိလာခဲ့ခြင်း ဖြစ်ကြောင်း Dawn သတင်းစာက ဖော်ပြသည်။

အဆိုပါကာလ မတိုင်မီ အမြင့်ဆုံးသော ငွေကြေးဖောင်းပွမှုနှုန်းသည် ၂၀၀၈ ခုနှစ် ဒီဇင်ဘာလက ၂၃ ဒသမ ၃ ရာခိုင်နှုန်း ဖြစ်သည်။

မြို့ပြဧရိယာများတွင် ငွေကြေးဖောင်းပွမှုက ၁၉ ဒသမ ၈၄ ရာခိုင်နှုန်း မြင့်တက်ခဲ့ပြီး ကျေးလက် ဧရိယာများတွင် ၂၃ ဒသမ ၅၅ ရာခိုင်နှုန်း မြင့်တက်ခဲ့ကြောင်း PBS က ထုတ်ပြန်သည်။

လုပ်ငန်းကဏ္ဍ အများအပြားတွင် ဂဏန်းနှစ်လုံး ငွေကြေးဖောင်းပွမှုနှုန်းကို မြင်တွေ့ခဲ့ရသည်။

သယ်ယူပို့ဆောင်ရေး ကဏ္ဍတွင် အမြင့်ဆုံး ငွေကြေးဖောင်းပွမှုနှုန်း ၆၂ ဒသမ ၁၇ ရာခိုင်နှုန်းအဖြစ် မှတ်တမ်း ဝင်ခဲ့ပြီး ပျက်စီး ပုပ်သိုးလွယ်သော အစားအစာ ပစ္စည်းများနှင့် ဈေးနှုန်းများက ၃၆ ဒသမ ၃၄ ရာခိုင်နှုန်း မြင့်တက်ခဲ့ကြောင်း ယင်းက ထုတ်ပြန်သည်။