အမေရိကန်သမ္မတ ဂျိုးဘိုင်ဒင်သည် ငွေကြေးဖောင်းပွမှုကို အားလျော့စေရန် ကြိုးပမ်းမှုအဖြစ် တရုတ်သွင်းကုန်အချို့အပေါ် အခွန်စည်းကြပ်မှု ရုပ်သိမ်းဖွယ်ရှိနေသည်။

ဘိုင်ဒင်အစိုးရအဖွဲ့သည် အစောပိုင်းက သမ္မတဟောင်း ဒေါ်နယ်ထရမ့်ချမှတ်ခဲ့သည့် တရုတ်သွင်းကုန်များအပေါ် စည်းကြပ်မှုအား ပြန်လည်သုံးသပ်မှုကို အပြီးသတ်လုပ်ဆောင်နေသည်ဟု New York Post သတင်းတွင် ဖော်ပြထားသည်။

အခွန်စည်းကြပ်မှုကို ဆက်လက်ထားစေလိုသော အမေရိကန်စီးပွားရေးလုပ်ငန်းများနှင့် အလုပ်သမား သမဂ္ဂများကို အစိုးရ၏ အပြီးသတ်ဆုံးဖြတ်ချက်မထုတ်ပြန်မီ ဇူလိုင် ၅ ရက် နောက်ဆုံးထား၍ သဘောထားမှတ်ချက်ပေးခိုင်းထားသည်။

ဘိုင်ဒင်သည် ၎င်း၏အကြီးတန်းလက်ထောက်များနှင့် အစိုးရအဖွဲ့အတွင်းဝန်များအကြား မူဝါဒ သဘောထား ကွဲလွဲမှုများကြောင့် အခွန်လျှော့ချရန် အစီအစဉ်များကို အကြိမ်ကြိမ်ရွှေ့ဆိုင်းခဲ့ကြောင်း Wall Street Journal ကို ကိုးကား၍ The New York Post က ဖော်ပြခဲ့သည်။

အမေရိကန် ကုန်သွယ်ရေး ကိုယ်စားလှယ် ကက်သရင်းတိုင်နှင့် အမျိုးသားလုံခြုံရေးအကြံပေး ဂျိတ်ခ် ဆူလီဗန်တို့သည် တရုတ်နိုင်ငံအပေါ် ဖိအားပေးသည့် လက်နက်အဖြစ် စည်းကြပ်ခွန်များဆက်ထားရှိရန် ထောက်ခံကြသည်။

စည်းကြပ်ခွန်များ ရုတ်သိမ်းခြင်းသည် ငွေကြေးဖောင်းပွမှု စံချိန်တင်မြင့်တက်မှုကြောင့် ယမန်နှစ်က သိသိသာသာ မြင့်တက်ခဲ့သော လူသုံးကုန်ပစ္စည်းများ၏ တန်ဖိုးကို လျှော့ချနိုင်လိမ့်မည်ဟု ဘိုင်ဒင်က မျှော်လင့်ထားကြောင်း New York Post က ဖော်ပြခဲ့သည်။

တရုတ်ကလည်း အမေရိကန်အနေဖြင့် သွင်းကုန်များအပေါ် အခွန်စည်းကြပ်မှု လျှော့ချသင့်ကြောင်း တောင်းဆိုထားသည်။