တရုတ်နိုင်ငံတွင် ကိုရိုနာဗိုင်းရပ်စ်ကူးစက်မှုမြင့်တက်လာစဉ်မှာ ပြည်တွင်းဖြစ် ကာကွယ်ဆေးများမှာ ထိရောက်မှုမရှိတော့သလို ကာကွယ်ဆေးထိုးပြီးသားသူများမှာလည်း ထပ်မံကူးစက်ခံနေရသည်။
အကူညီမဲ့နေသည့် ပေကျင်းအစိုးရသည် ယခုအခါ ပြင်းထန်လှသော ကိုဗစ်-၁၉ ရောဂါနှင့်ပတ်သက်၍ သတိပေးလိုက်ပြီဖြစ်ကြောင်း Asian Lite International သတင်းကဖော်ပြသည်။ ထိရောက်မှုမရှိသော ကာကွယ်ဆေးက တရုတ်နိုင်ငံကို ထိခိုက်မှုများရှိနေချိန်တွင် အိန္ဒိယတွင်မူ အောင်မြင်သော ကာကွယ်ဆေး ထိုးမှုကြောင့် ပုံမှန်အခြေအနေသို့ ပြန်ရောက်နေပြီဖြစ်သည်။
အာရှနိုင်ငံကြီးများဖြစ်သည့် တရုတ်နှင့် အိန္ဒိယတို့သည် ကိုဗစ်-၁၉ ကာကွယ်ဆေးထုတ်ရာတွင် အပြိုင် အဆိုင်ကြိုးပမ်းခဲ့ကြသည်။ တရုတ်က ကိုဗစ်-၁၉ ကာကွယ်ဆေးကို ပထမဆုံးတီထွင်နိုင်ခဲ့သည့် နိုင်ငံ ဖြစ်သော်လည်း အိန္ဒိယက ၎င်းနိုင်ငံသားများကို အသွားအလာပိတ်ဆို့မှုများနှင့် ကန့်သတ်ချက်များမှ ဖြေလျှော့ ပေးလိုက်သောကြောင့် ၎င်း၏ကာကွယ်ဆေးမှာ ကြီးကြီးမားမားအောင်မြင်မှုရခဲ့ကြောင်း သက်သေပြခဲ့သည်ဟု Asian Lite International ကဖော်ပြသည်။
ဟောင်ကောင်တက္ကသိုလ်တစ်ခု၏လေ့လာမှုက တရုတ်ကာကွယ်ဆေးများမှာ ၆၀ ရာခိုင်နှုန်းသာ ထိရောက်မှုရှိကြောင်း ဖော်ထုတ်ခဲ့သည်။ ထို့ပြင် တရုတ် Sinovac ကာကွယ်ဆေးထိုးသူများသည် ဂျာမနီထုတ် Pfizer-BioNTech ကုမ္ပဏီထုတ် ကိုဗစ်ကာကွယ်ဆေးထိုးထားသူများနှင့် နှိုင်းယှဉ်ပါက သေဆုံးနိုင်ခြေ ၃ ဆပိုများကြောင်း လေ့လာတွေ့ရှိခဲ့သည်ဟု ဆိုသည်။
အစောပိုင်းက တရုတ်ကာကွယ်ဆေးကို ဝယ်ယူထားသည့် ဘရာဇီး၊ ဘာရိန်း၊ ယူအေအီးနှင့် အင်ဒိုနီးရှားတို့က တရုတ်၏ ကိုဗစ်-၁၉ ကာကွယ်ဆေး၏ထိရောက်မှုနှင့်ပတ်သက်၍ မေးခွန်းထုတ်ခဲ့ကြသည်။
The Lancet Infectious Diseases ဂျာနယ်တွင်ဖော်ပြခဲ့သော တရုတ်လေ့လာမှုတစ်ခုအရ တရုတ် ကာကွယ်ဆေးများသည် အိုမီခရွန်မျိုးကွဲများကို ကာကွယ်နိုင်စွမ်းမရှိဟု Asian Lite International ကဆိုသည်။
တရုတ်အာဏာပိုင်များသည် ဗိုင်းရပ်စ်ကူးစက်မှုကို လျှော့ချရန် အငြင်းပွားဖွယ်ရာ ကိုဗစ်လုံးဝ ကင်းစင်ရေးမူဝါဒအပါအဝင် ဖြစ်နိုင်သမျှစီမံချက်အားလုံးကို ကြိုးပမ်းလုပ်ဆောင်ခဲ့သော်လည်း အချည်း နှီးဖြစ်ခဲ့သည်။ ရောဂါဖြစ်ပွားမှုနှုန်းမှာ မြင့်မားလျက်ရှိပြီး တရုတ်နိုင်ငံ၏ ပုံမှန်လူနေမှုဘဝကို ထိခိုက်စေလျက်ရှိသည်။
