လူထုခေါင်းဆောင် ဒေါ်အောင်ဆန်းစုကြည်၏ ယနေ့ ဇွန်လ ၁၉ ရက်နေ့ တွင် ကျရောက်သည့် ၇၇ နှစ်ပြည့် မွေးနေ့တွင် ရန်ကုန်အခြေစိုက်သပိတ်ကော်မတီများ ပူးပေါင်း၍ စစ်အာဏာရှင်ဆန့်ကျင်ရေးလှုပ်ရှားမှုတစ်ခု ပြုလုပ်ခဲ့သည်။
ရန်ကုန်မြို့ လမ်းမတစ်နေရာတွင် “ဦးအောင်ဆန်းသမီး နေကောင်းကျန်းမာပါစေ” ဟူသော စာသားနှင့်အတူ “ဖမ်းဆီးထားသော နိုင်/ကျဉ်းများ ချက်ချင်းလွှတ်” ဟူသောကြွေးကြော်သံများဖြင့် ဟစ်ကြွေးဟာ စစ်အာဏာရှင် စနစ်ဆန့်ကျင်ရေး ချီတက်သပိတ်မှောက်ခဲ့ကြသည်။
ထို့အပြင် ရန်ကုန်အခြေစိုက်သပိတ်ကော်မတီများ ပူးပေါင်းအဖွဲ့သည် အကြမ်းဖက် စစ်တပ်၏ လူမဆန်စွာ ဖမ်းဆီးနှိပ်စက်ခံ နိုင်ငံရေး အကျဉ်းသားများနှင့် ပြည်သူများစွာ အတွက် “ဖမ်းဆီးခံ နိုင်/ကျဉ်းများအား ချက်ခြင်းလွှတ်” အစရှိသည့်ကြွေးကြော်သံများ ကိုလည်း ဟစ်ကြွေးကာ လူထုတစ်ရပ်လုံးသွေးမအေးစေရန် လှုံ့ဆော်မှုများပြုလုပ်ခဲ့သည်။
အဆိုပါ လှုပ်ရှားမှုကို Yangon Revolution Force - YRF (Soft Strike Community) ၊ ရန်ကုန်ရဲ့သူပုန်များသပိတ်ကော်မတီ (YRSC)၊ Revolution Force - RF၊ နှင့် အခြေခံကျောင်းသားများရေးရာအဖွဲ့ (အကရ) တို့ ပူးပေါင်းချီတက်လုပ်ဆောင်ခဲ့ကြခြင်း ဖြစ်သည်။