တရုတ်နိုင်ငံ၌ လာမည့်သီတင်းပတ်တွင် ကန့်ကွက်မှုများရှိနေသော ခွေးသားစားပွဲတော်ကို စတင်ရန် စီစဉ်ထားသောကြောင့် ပြည်တွင်းနှင့်နိုင်ငံတကာမှ တက်ကြွလှုပ်ရှားသူများနှင့် တိရစ္ဆာန်အခွင့်အရေးအဖွဲ့များ၏ မကျေနပ်မှုများကို ပြန်လည်ဖြစ်ပေါ်လာစေသည်။
ဗီယက်နမ်နိုင်ငံနှင့် နယ်နိမိတ်ချင်းထိစပ်နေသော ကိုယ်ပိုင်အုပ်ချုပ်ခွင့်ရ ကွမ်းရှီးဒေသ၌ တည်ရှိသည့် တရုတ်နိုင်ငံတောင်ပိုင်း ယုလင်းမြို့၌ ‘လိုက်ချီးနှင့် ခွေးသားစားပွဲတော်ကို’ နှစ်စဉ်ကျင်းပလေ့ရှိသည်။
ယမန်နှစ်က သတ်ဖြတ်ခံရမည့် ခွေးတစ်အုပ်ပို့ဆောင်ခြင်းကို တားဆီးနိုင်ခဲ့သော တရုတ်ရှိ တက်ကြွလှုပ်ရှားသူများက ပွဲတော်ပိတ်ပင်ရေးအတွက် ကိုဗစ်-၁၉ ကန့်သတ်ချက်များ တိုးမြှင့်လုပ်ဆောင်ရန် ဒေသအာဏာပိုင်များအား တိုက်တွန်းထားသည်။
“တရုတ်နိုင်ငံရဲ့ အခြားမြို့ကြီးတွေမှာ ကိုဗစ်-၁၉ ပိတ်ဆို့မှုတွေ ဖော်ဆောင်နေချိန် ပြည်နယ်နဲ့မြို့ထဲကို ဧည့်သည်တွေလာစေဖို့ ယုလင်းခွေးသားကုန်သည်အဖွဲ့ကို ခွင့်ပြုတာဟာ အဓိပ္ပါယ်မရှိပါဘူး။ နောက်ပြီး ဒါဟာ ခွေးနဲ့ ကြောင် ထောင်ပေါင်းများစွာ သေဆုံးစေမယ့် စိတ်ပျက်ဖွယ်
တိရစ္ဆာန်အပေါ်နှိပ်စက်မှုကြီးလည်း ဖြစ်ပါတယ်။ ပြည်သူ့ကျန်းမာရေးအတွက်လည်း အန္တရာယ်ဖြစ်စေပါတယ်” ဟု ကွမ်းရှီးအခြေစိုက် တက်ကြွလှုပ်ရှားသူ လျန်ကျားက ပြောသည်။
ကိုဗစ်-၁၉ ကန့်သတ်ချက်များကြောင့် ၁၀ ရက်ကြာကျင်းပသည့် ပွဲတော်သို့ လာရောက်သူမှာ မကြာသေးမီ နှစ်များအတွင်း နည်းပါးသွားသော်လည်း ပွဲတော်အတွက် သတ်ဖြတ်ရန် ခွေး ၁ ၀၀၀ ကျော်စုဆောင်းထားကြောင်း သတင်းများထွက်ပေါ်နေသည်။
တရုတ်နိုင်ငံ၏ စိုက်ပျိုးရေးနှင့် ကျေးလက်ရေးရာဝန်ကြီးဌာနက၂၀၂၀ ခုနှစ်တွင် ထုတ်ပြန်ခဲ့သော မူဝါဒမူကြမ်းတွင် ခွေးများကို မွေးမြူရေးတိရစ္ဆာန်များအဖြစ် အသိအမှတ်မပြုဘဲ 'အထူးအဖော်တိရစ္ဆာန်' ဟု ခေါ်တွင်ခဲ့ကြောင်း Guardian က ဖော်ပြခဲ့သည်။
ထိုမူဝါဒသည် ဥပဒေသက်ရောက်မှု အပြည့်အဝ မရှိခဲ့သော်လည်း တရုတ်နိုင်ငံနှင့်ပြင်ပရှိ တိရစ္ဆာန်အခွင့်အရေး လှုပ်ရှားသူများက ကြိုဆိုခဲ့ကြသည်။
ထိုနှစ်တွင်ပင် နိုင်ငံတစ်ဝန်းရှိ တရုတ်နိုင်ငံသား ၇၅ ရာခိုင်နှုန်းက ခွေးသားစားသုံးမှုကို တားမြစ်သော တောင်ပိုင်းရှန်ကျန်းမြို့၏ ဆုံးဖြတ်ချက်ကို ထောက်ခံကြောင်း တရုတ်အစိုးရပိုင် မီဒီယာက ဖော်ပြခဲ့သည်။
