ကိုဗစ်ကပ်ရောဂါကို ထိန်းချုပ်ရန် တင်းကျပ်သောကန့်သတ်မှုများကြောင့် တရုတ်စီးပွားရေးသည် ထုတ်လုပ်မှု စွမ်းရည်နှင့် အခြားထောက်ပံ့ပို့ဆောင်ရေးတို့ကို ဆိုးရွားစွာထိခိုက်စေခဲ့ပြီး ဖိအားများအောက်တွင် ရှိနေသည်။
ကိုဗစ်ကင်းစင်ရေးမူဝါဒကြောင့် အခက်အခဲများအပြင် ယူကရိန်းစစ်ပွဲသည် ကမ္ဘာ့ ဒုတိယအကြီးဆုံး စီးပွားရေး ဖြစ်သော တရုတ်၏ ကျဆင်းမှုများကို ပိုမိုဖြစ်ပေါ်စေသည်။
တရုတ်ပို့ကုန်ကဏ္ဍသည် ၂၀၂၂ ခုနှစ် ဧပြီလတွင် နှစ်အလိုက် တိုးတက်မှုနှုန်း ၃ ဒသမ ၉ ရာခိုင်နှုန်း တိုးလာ ခဲ့ပြီး ၂၀၂၀ပြည့်နှစ် ဇူလိုင်လနောက်ပိုင်း အနိမ့်ဆုံးဖြစ်ကြောင်း တရုတ်အကောက်ခွန်မှ ထုတ်ပြန်သော အချက် အလက်များကို ကိုးကား၍ The Singapore Post သတင်းဌာနက ဖော်ပြခဲ့သည်။
ရုရှား-ယူကရိန်းပဋိပက္ခနှင့် တရုတ်တွင် ကိုဗစ်-၁၉ မြင့်တက်မှုကြောင့် ကမ္ဘာ့စီးပွားရေးတိုးတက်မှုနှုန်းသည် ၂၀၂၁ခုနှစ်နှင့် နှိုင်းယှဉ်ပါက ထက်ဝက်ကျော်လျော့နည်းမည်ဟု ရင်းနှီးမြှုပ်နှံမှုစီမံခန့်ခွဲမှု ကုမ္ပဏီ Morgan Stanley က ခန့်မှန်း ထားသည်။
၂၀၂၂ ခုနှစ်တွင် ကမ္ဘာလုံးဆိုင်ရာ တိုးတက်မှုသည် ၂၀၂၁ခုနှစ်က ၆ ဒသမ ၂ ရာခိုင်နှုန်းနှင့် နှိုင်းယှဉ်ပါက ယခုနှစ်တွင် ၂ ဒသမ ၉ ရာခိုင်နှုန်း ကျဆင်းဖွယ်ရှိသည်။
နိုင်ငံတကာငွေကြေးရန်ပုံငွေအဖွဲ့ (IMF) ကလည်း ၂၀၂၂ခုနှစ်တွင် GDP တိုးတက်မှုနှုန်း ၄ ဒသမ ၄ ရာခိုင်နှုန်းနှင့်၂၀၂၃ ခုနှစ် တွင် ၅ ဒသမ ၁ ရာခိုင်နှုန်း အသီးသီး မျှော်မှန်းထားပြီး ၂၀၂၁ ခုနှစ်တွင် ခန့်မှန်းခြေ ၈ ဒသမ ၁ ရာခိုင်နှုန်းနှင့် ဆန့်ကျင်ဘက်ဖြစ်နေသည်။
အမေရိကန်ဘဏ္ဍာရေးဝန်ကြီး ဂျင်းနက် ယဲလန်က တရုတ်တွင် ပိတ်ဆို့ကန့်သတ်ထားမှုများသည် ကုန်စည် စီးဆင်းမှုကို အဟန့်အတားဖြစ်စေပြီး ကမ္ဘာလုံးဆိုင်ရာ ထောက်ပံ့ရေးကွင်းဆက်များကို အဟန့်အတားဖြစ်စေ သည်ဟု ပြောကြားခဲ့သည်။
ကိုဗစ်ဖိအားအချို့ကို လျော့ပါးသွားစေနိုင်သော်လည်း တရုတ်တွင် ဖြစ်ပေါ်နေမှုများသည် အဆိုပါ ထုတ်လုပ်တင်ပို့မှုကွင်းဆက်ဖိအားများကို ပိုမိုဆိုးရွားစေသည်ဟု သူမက ပြောကြားခဲ့သည်။
