မေ ၂၆
ထိုင်းနိုင်ငံသို့ တရားမဝင် ဝင်ရောက်လာသည့် မြန်မာနိုင်ငံသားများ ပါသည့် လှေသည် မေလ ၂၁ ရက်နေ့ ည ၉ နာရီတွင် မြဝတီခရိုင် ထိုင်း-မြန်မာ နယ်စပ် သောင်းရင်းမြစ်အတွင်း တိမ်းမှောက်ပြီး သုံးဦး သေဆုံးကာ ခြောက်ဦး ပျောက်ဆုံးနေသည်ဟု ဒေသခံ တစ်ဦးက ပြောသည်။
“လှေမှာ ဘယ်နှစ်ယောက် ပါလည်း ဆိုတာ သေချာတော့ မသိသေးဘူး။ လောလောဆယ် အလောင်း သုံးလောင်း တွေ့တယ်။ အမျိုးသမီးတွေပဲ။ နောက်ထပ် ခြောက်ယောက် ပျောက်နေတယ် လို့တော့ ပြောတယ်။ သေချာတော့ မသိဘူး။ အမျိုးသမီး တစ်ယောက်တော့ ကယ်လိုက်နိုင်တယ်။ သူတို့ကူးတဲ့ နေ့က လေကြီးမိုးကြီး ကျတဲ့နေ့လေ။ ရေမတရား တက်နေတာ။ လုံးဝ မကူးသင့်ဘူး။ ပွဲစားတွေကလည်း ပိုက်ဆံရပြီးရော ဆိုတဲ့ ပုံစံတော့ မလုပ်သင့်ဘူး။ အားလုံးက အသက်နဲ့ ရင်းထားရတာလေ။ ကူးတဲ့သူတွေလည်း ဒီလို အန္တရယ် များတဲ့ အချိန်မှာတော့ မကူးသင့်ဘူးဗျ” ဟု အဆိုပါ ဒေသခံက ပြောသည်။
အလောင်းသုံးလောင်းကို ဖလူးလေး စခန်းရှိ စစ်ကောင်စီတပ်က မီးရှို့ သင်္ဂြိုဟ်ခဲ့သည်။ လှေပေါ် ပါလာသူများတွင် ပဲခူးတိုင်း သနပ်ပင်မြို့နယ် ကုလားချောင်းကျေးရွာမှ အများဆုံး ပါဝင်နေပြီး အမျိုးသား တစ်ဦးလည်း ပျောက်ဆုံးနေသည်ဟု သတင်းရင်းမြစ်က ပြောသည်။
ယခုနှစ်အတွင်း ထိုင်းနိုင်ငံသို့ တရားမဝင် အလုပ် လုပ်ကိုင်ရန် ဝင်ရောက်လာသည့် မြန်မာ နိုင်ငံသားများ ထိုင်းနိုင်ငံ နယ်စပ်တွင် နေ့စဉ်နီးပါး ဖမ်းဆီး ခံနေရပြီး ထိုင်းနိုင်ငံကို ဝင်ရောက်စဉ် လှေမှောက်ခြင်း၊ ကားမှောက်ခြင်းနှင့် ကားနောက်ခန်း အတွင်း အောက်စီဂျင် ပျက်ကာ သေဆုံးမှုများလည်း ရှိနေသည်။
