ပါကစ္စတန် ဝန်ကြီးချုပ်ဟောင်း အီမရန် ခန်းသည် ဒေါ်လာ ဘီလီယံများစွာတန် တရုတ်-ပါကစ္စတန် စီးပွားရေးစင်္ကြံ (CPEC) စီမံကိန်းများကို လိမ်လည်ထားသည့် စာရင်းစစ်ဆေးမှု လုပ်ဆောင်ခြင်းအားဖြင့် ပျက်စီးစေခဲ့သည်ဟု လက်ရှိပါကစ္စတန်ဝန်ကြီးချုပ် ရှာဘတ်ဇ် ရှာရစ်က မေလ ၈ ရက်တွင် စွပ်စွဲပြောဆိုလိုက်သည်။ ထိုကဲ့သို့ CPEC စီမံကိန်းများကို မှုခင်းစာရင်းစစ်ဆေးမှု လုပ်ဆောင်ခြင်းက တရုတ်အာဏာပိုင်များကို အမျက်ထွက်စေခဲ့သည်ဟု ရှာရစ်က ပြောသည်။
ပါကစ္စတန်ဝန်ကြီးချုပ် ရှာဘတ်ဇ် ရှာရစ်သည် လာဟိုးမြို့၌ ပါကစ္စတန် သတင်းစာ အယ်ဒီတာများ ကောင်စီ (CPNE) ၏ ကိုယ်စားလှယ်အဖွဲ့တစ်ခုနှင့် တွေ့ဆုံစဉ် CPEC မအောင်မြင်မှုအတွက် အီမရန် ခန်းတွင် တာဝန်ရှိကြောင်း စွပ်စွဲပြောဆိုခဲ့သည်ဟု မီဒီယာသတင်းဖော်ပြချက်တစ်ရပ်ကို ကိုးကားပြီး The Express Tribune က ဖော်ပြသည်။
၎င်းအနေဖြင့်ကမူ ညီနောင်ရင်းချာ နိုင်ငံများ၊ အခြားနိုင်ငံများနှင့် ဆက်ဆံရေးကို အပြန်အလှန် လေးစားမှုနှင့် အပြန်အလှန် အကျိုးစီးပွားတို့အပေါ် အခြေတည်ပြီး ထိန်းသိမ်းသွားမည်ဟု ရှာဘတ်ဇ် ရှာရစ်က ပြောသည်။
ပါကစ္စတန်သည် ဂွာဒါတွင် ဒေါ်လာ သန်း ၃၀၀ ကျော် တန်ကြေး ရှိသည့် တရုတ်-ပါကစ္စတန် စီးပွားရေးစင်္ကြံ စီမံကိန်းသုံးခုကိုသာလျင် ပြီးမြောက်ထားနိုင်ခဲ့ပြီး ရေပေးဝေမှုနှင့် လျှပ်စစ်ဓာတ်အားပေးမှု အပါအဝင် ဒေါ်လာ ၂ ဘီလီယံနီးပါး ကုန်ကျသည့် စီမံကိန်း တစ်ဒါဇင်ခန့်သည် မပြီးစီးသေးသည့် အခြေအနေတွင် ဆက်ရှိနေဆဲဖြစ်သည်ဟု CPEC အာဏာပိုင်အဖွဲ့က ထုတ်ဖော်သည်။
ယင်းနိုင်ငံသည် စီမံကိန်းများ၊ အစီအစဉ်များ၏ မူလစီစဉ်ထားသည့် သက်တမ်းကာလအတိုင်း ပြီးစီးမှုပိုင်းတွင် နောက်ကျနေခဲ့သည်။
