တရုတ်ရေတပ်မှ သင်္ဘောအုပ်စု သည် လောင်နင်းလေယာဉ်တင်သင်္ဘောဦးဆောင်လျက် အရှေ့တရုတ်ပင်လယ်မှ ပစိဖိတ်သမုဒ္ဒရာသို့ ဦးတည်ခုတ်မောင်းလာသည်ကို တွေ့ရှိပြီးနောက် ဂျပန်နှင့် ထိုင်ဝမ်က စစ်တပ်များကို တပ်လှန့်ထားခဲ့သည်။

ဖျက်သင်္ဘောများနှင့် ထောက်ပံ့ရေးသင်္ဘောများ ၇ စင်းလိုက်ပါလာသည့် လောင်နင်းသင်္ဘောသည် အရှေ့တရုတ် ပင်လယ်မှ ထွက်ခွာပြီး အနောက်ပစိဖိတ်သို့ မဝင်ရောက်မီ ဂျပန်၏ အိုကီနာဝါနှင့် မီယာကို ကျွန်းများကြား ရေပြင်ကို ဖြတ်သန်းသွားခဲ့ကြောင်း ဂျပန်ကိုယ်ပိုင်ကာကွယ်ရေးတပ်ဖွဲ့၏ ပူးတွဲစစ်ဦးစီးရုံးက မေ ၂ရက်တွင် ထုတ်ပြန်သည့် ကြေညာချက်တွင် ဖော်ပြထားသည်။

ဂျပန်ကာကွယ်ရေးဝန်ကြီးဌာနသည် တရုတ်သင်္ဘောများ၏ လှုပ်ရှားမှုများကို စောင့်ကြည့်ရန် P-1 ရေကြောင်း ကင်းလှည့်လေယာဉ်နှင့် P-3C ရေငုပ်သင်္ဘောဖျက်လေယာဉ်၊ အီဇူမီအပေါ့စား လေယာဉ်တင်သင်္ဘောတို့ကို စေလွှတ်ခဲ့ကြောင်း ထုတ်ပြန်ချက်တွင် ဖော်ပြထားသည်။

ထိုင်ဝမ်စစ်တပ်ပြောရေးဆိုခွင့်ရှိသူ ဆွန်လီဖန်ကလည်း ထိုင်ဝမ်စစ်တပ်သည် ထိုင်ဝမ်အနီး တစ်ဝိုက်ရှိ ရေပြင်နှင့် လေပိုင်နက်အတွင်း တရုတ်စစ်ရေးလေ့ကျင့်မှုများကို အနီးကပ်စောင့်ကြည့်နေပြီး သင့်လျော်သော တုံ့ပြန်ဆောင်ရွက်မှုများကို လုပ်ဆောင်မည်ဖြစ်ကြောင်း မေ ၃ရက်တွင် ပြောကြားခဲ့သည်။

လောင်နင်းသင်္ဘောအုပ်စုရှိ စစ်သင်္ဘော ၇ စင်းတွင် Type 055 ကြီးမားသော ပဲ့ထိန်းဒုံး ကျည်ဖျက်သင်္ဘော နန်ချန်း၊ Type 052D ပဲ့ထိန်းဒုံးကျည်ဖျက်သင်္ဘောချန်ဒူနှင့် Type 901 အလုံးစုံ ထောက်ပံ့ ရေးသင်္ဘော ဟူလန်ဟူတို့ပါဝင်ကြောင်း ဂျပန်၏ ထုတ်ပြန်ချက်တွင် ဖော်ပြထားသည်။

လောင်နင်း သင်္ဘောအုပ်စု၏ လတ်တလော ရေကြောင်းသွားလာမှုအတွင်း စုစုပေါင်း သင်္ဘော ၈ စင်းဖြင့် အများဆုံးသွားလာမှု ဖြစ်ကြောင်း နိုင်ငံပိုင် တရုတ်သတင်းစာ Global Times က ဖော်ပြခဲ့သည်။

လောင်နင်းနှင့် အခြားသင်္ဘောများသည် 'ပုံမှန် PLA ရေတပ်၏ ကမ်းဝေးပင်လယ်ပြင်လေ့ကျင့်မှု' တွင် ပါဝင်နိုင်သည်ဟု သတင်းစာက ဆိုသည်။

လောင်နင်းလေယာဉ်တင်သင်္ဘောအုပ်စုသည် ထိုင်ဝမ်နှင့် ဂျပန်တို့ပါဝင်သော First Island Chain ဟုခေါ်သော ပစိဖိတ်သမုဒ္ဒရာအတွင်းသို့ ၂၀၂၂ခုနှစ်အတွင်း ပထမဆုံးအကြိမ် ဝင်ရောက်လာခြင်းဖြစ်သည်။