ကိုဗစ်ဖြစ်ပွားမှုကြောင့် အသွားအလာပိတ်ဆို့မှုခံနေရသော ပြည်သူများအား စားနပ်ရိက္ခာနှင့် အခြားလိုအပ်သည်များထောက်ပံ့ခြင်းထက် တရုတ်တိုင်းရင်းဆေး Lianhua Qingwen ကို ဦးစားပေးထောက်ပံ့ရာတွင် အဆိုပါဆေး၏ ထိရောက်မှုကို သေချာစွာစိစစ်ရန် တရုတ်ဦးနှောက်နှင့်အာရုံကြောပညာရှင်တစ်ဦးက အာဏာပိုင်များကို တောင်းဆိုလိုက်သည်။
လူဦးရေ ၂၅ သန်းထက်မနည်းသည် လတ်ဆတ်သော ဟင်းသီးဟင်းရွက်များ၊ ဆန်နှင့် ပါးစပ်နှာခေါင်းစည်းများ ရနိုင်ရန် ကြိုးပမ်းနေချိန်တွင် Lianhua Qingwen ဆေးသေတ္တာ အနည်းဆုံး ၈ သန်းခန့်ကို အိုမီခရွန်မျိုးကွဲ တိုက်ဖျက်ရန် ရှန်ဟိုင်းသို့ ပို့ဆောင်နေကြသည်။
“ကိုဗစ်-၁၉ ဆေးဖြန့်တာဟာ သေသေချာချာ စမ်းသပ်စစ်ဆေးမှုတွေ လုပ်သင့်ပါတယ်။ အတုအယောင်နဲ့ ဖြစ်ကတတ်ဆန်းလုပ်ထားတဲ့ဆေးတွေကို ပြည်သူတွေကို မပေးသင့်ပါဘူး” ဟု ပေကျင်းရှိ Capital Medical University မှ ဥက္ကဋ္ဌ ရောင်ရီက လူမှုမီဒီယာ WeChat တွင် ရေးသားခဲ့သည်။ ဧပြီ ၈ ရက် ဈေးကွက်စာရင်းအရ ဆေးဝါးကုမ္ပဏီ Shijiazhuang Yiling သည် ယွမ် ၆၁ သန်း ( အမေရိကန်ဒေါ်လာ ၉ ဒသမ ၅ သန်း) တန်ဖိုးရှိ Lianhua Qingwen ဆေးသေတ္တာ အနည်းဆုံး ၈ သန်းကို ရှန်ဟိုင်းသို့ လှူဒါန်းခဲ့သည်။
စေတနာ့ဝန်ထမ်းပို့ဆောင်ရေးသမားတစ်ဦးက အရေးတကြီး လိုအပ်သော ဟင်းသီးဟင်းရွက်များ၊ ဆန်နှင့် ပါးစပ်နှာခေါင်းစည်းတို့အစား ၎င်း၏လုပ်အား ၃ ပုံ ၁ ပုံကို ဆေးကုသမှုအတွက် ပို့ဆောင်ရေးယာဉ်တန်းတွင် မြှုပ်နှံထားရကြောင်း ပြီးခဲ့သည့်သီတင်းပတ်က ပြောဆိုပြီးနောက် လှူဒါန်းမှုကို ဦးစားပေးသောပို့ဆောင်မှုအကြောင်းသည် အွန်လိုင်းတွင် ပျံ့နှံ့သွားခဲ့သည်။
Lianhua Qingwen ဆေးများကို ကျန်းမာရေးကောင်းသောသူများထံ ပေးပို့နေခြင်းကြောင့် ကျန်းမာရေးကောင်းသူများသောက်လျှင် အစာအိမ်နှင့်ကျောက်ကပ်ပျက်စီးခြင်းဖြစ်စေနိုင်ကြောင်း နိုင်ငံတစ်ဝန်းက ဆရာဝန်များက သတိပေးခဲ့ရသည်ဟု ရှန်ဟိုင်းအခြေစိုက် အစိုးရပိုင်မီဒီယာ Jiefang Daily နှင့် ဝူဟန်အခြေစိုက် Hubei Daily တို့တွင် ဖော်ပြထားသည်။
Lianhua Qingwen ဆေးသည် ဖျားနာခြင်း၊ ချောင်းဆိုးခြင်းနှင့် မောပန်းနွမ်းနယ်ခြင်းစသည့် အပျော့စားမှ အလတ်စားရောဂါလက္ခဏာများအတွက် အကြံပြုထားသော ကုသမှုအဖြစ် ၂၀၂၀ ခုနှစ် ဧပြီလတွင် တရုတ်နိုင်ငံ၏ ကိုဗစ်-၁၉ လမ်းညွှန်ချက်များတွင် ပါဝင်လာခဲ့သည်။
ဟောင်ကောင်တွင်လည်း မြို့အနှံ့ဖြန့်ဝေသော ကပ်ရောဂါတိုက်ဖျက်ရေးလက်နက်အဖြစ် ထည့်သွင်းထားသည်။