ရေငုပ်သင်္ဘောအတွက်လိုအပ်သော တွန်းကန်အားစနစ်အတွက် ဂျာမန်ကုမ္ပဏီထံမှ လိုအပ်သော ပစ္စည်းကို မရရှိသောကြောင့် ထိုင်းသည် တရုတ်ထံမှ ရေငုပ်သင်္ဘောတစ်စီး ဝယ်ယူမည့်အစီအစဉ် ပျက်ပြယ်သွား နိုင်ကြောင်း ဝန်ကြီးချုပ် ပရာယွတ်ချန်အိုချာက ပြောသည်။
တရုတ်သည် ဝယ်ယူမှု သဘောတူညီချက်တွင် သတ်မှတ်ထားသည့် အင်ဂျင်များကို တပ်ဆင်နိုင်ခြင်းမရှိပါက ရေငုပ်သင်္ဘောဝယ်ယူရေးသဘောတူညီချက်သည် ပျက်ပြယ်နိုင်ကြောင်း ဝန်ကြီးချုပ် ပရာယွတ်ချန်အိုချာက ဧပြီ ၄ ရက်တွင် သတိပေးခဲ့သည်။
တော်ဝင်ထိုင်းရေတပ် (RTN) အတွက် တည်ဆောက်နေသည့် S26T Yuan-အတန်းအစား ရေငုပ်သင်္ဘောတွင် တပ်ဆင်ရန် တရုတ်နိုင်ငံသို့ MTU396 ဒီဇယ်အင်ဂျင်များ ရောင်းချပေးရန် ဂျာမန်ကုမ္ပဏီမှ ငြင်းဆိုခဲ့သည့် သတင်းများအပေါ် သတင်းထောက်များကမေးရာတွင် ပရာယွတ်က ယခုကဲ့သို့ ဖြေကြားခဲ့ခြင်းဖြစ်သည်။
ဝန်ကြီးချုပ်က သဘောတူညီချက် အချိန်မီ ပြီးမြောက်ရေး အစွမ်းကုန်လုပ်ဆောင်ရန် ရေတပ်အား ညွှန်ကြားခဲ့သော်လည်း တရုတ်က မဖြည့်ဆည်းပေးနိုင်ပါက စာချုပ်ကို ဖျက်သိမ်းရလိမ့်မည်ဟု ဆိုကြောင်း Bangkok Post က ဖော်ပြခဲ့သည်။
စာချုပ်ကို အစိုးရက ရပ်စဲနိုင်သလားဟူသော မေးခွန်းနှင့်ပတ်သက်၍ အဆိုပါကိစ္စအား သက်ဆိုင်ရာအာဏာပိုင်များက ထည့်သွင်းစဉ်းစားမည်ဖြစ်ပြီး ဝယ်ယူရေးလုပ်ငန်းစဉ်နှင့်အညီ ဝန်ကြီးချုပ်အနေဖြင့် အဆင့်တိုင်းတွင် ဝင်ရောက်စွက်ဖက်ရန် မလိုအပ်ဟု ပရာယွတ်က ပြောသည်။
ဧပြီ ၂ ရက်က ရေတပ်ဦးစီးချုပ် အဒမ်ဆွမ်ပရာဆန်နီဆာမိုင်က ရေငုပ်သင်္ဘောသဘောတူစာချုပ်တွင် အပြောင်းအလဲတစ်စုံတစ်ရာ မပြုလုပ်ရသေးကြောင်းနှင့် တရုတ်နိုင်ငံသည် လက်မှတ်ရေးထိုးထားသည့်အတိုင်း အဆိုပါစာချုပ်ကို လိုက်နာရမည်ဟု အခိုင်အမာပြောဆိုခဲ့သည်။
သဘောတူညီချက်အရ ရေငုပ်သင်္ဘော၏အင်ဂျင်များကို ဂျာမနီနိုင်ငံ MTU ကုမ္ပဏီမှ ပံ့ပိုးပေးရမည်ဖြစ်သော်လည်း ၎င်းတို့အား စစ်ရေး/ကာကွယ်ရေးပစ္စည်းဟု သတ်မှတ်ထားခြင်းကြောင့် ကုမ္ပဏီသည် ကုန်သွယ်ခွင့်ပိတ်ပင်မှုအရ ရောင်းခွင့်မရှိပေ။
