အငြင်းပွားတောင်တရုတ်ပင်လယ်တွင် တရုတ်သင်္ဘောတစ်စီးက အနီးကပ်လေ့ကျင့်မှုပြုလုပ်ခဲ့သည်ဟု ဖိလစ်ပိုင်က ထုတ်ပြန်အသိပေးလိုက်သည်။

ဘရူနိုင်း၊ မလေးရှား၊ ဖိလစ်ပိုင်၊ ထိုင်ဝမ်နှင့် ဗီယက်နမ်တို့ကလည်း ပိုင်ဆိုင်မှုမကင်းကြောင်း ပြောဆိုနေသည့် တောင်တရုတ်ပင်လယ်နေရာအများစုကို တရုတ်က ဆက်လက်တောင်းဆိုနေစဉ်မှာ ယခုဖြစ်ရပ်ပေါ်ပေါက်လာခြင်းဖြစ်သည်။

ဘာဂျိဒီမာစင်လော့ ဟုဒေသတွင်းခေါ်ကြသည့် Scarborough ရေတိမ်သောင်ခုံ တစ်ဝိုက်တွင် ဖိလစ်ပိုင်ပင်လယ်ပြင်ကင်းလှည့်မှု လုပ်ဆောင်နေစဉ် မတ် ၂ ရက်က အနီးကပ်လေ့ကျင့်မှုဖြစ်ပွားခဲ့ကြောင်း ဖိလစ်ပိုင်ကမ်းခြေစောင့်တပ် (PCG) က မတ်လ ၂၇ ရက်က ပြောကြားခဲ့သည်။

ဖိလစ်ပိုင်ကမ်းခြေစောင့်တပ် ရေယာဉ်BRP Malabrigo (MRRV-4402) သည် ဘာဂျိုဒီရေတိမ်သောင်ခုံ အနီးတစ်ဝိုက် ရေပြင်တွင် ခုတ်မောင်းနေစဉ်၎င်းနှင့် ၂၁ ကိုက်ခန့် အကွာအဝေး၌ တရုတ်ကမ်းခြေစောင့်တပ်ရေယာဉ် (CCG - 3305) သည် အနီးကပ်လေ့ကျင့်မှု ပြုလုပ်နေမှုကို စောင့်ကြည့်ခဲ့သည်ဟု ဖိလစ်ပိုင်ကမ်းခြေစောင့်တပ် (PCG) ၏ ထုတ်ပြန်ချက်တွင် ဖော်ပြထားသည်။

PCG တပ်မှူးချုပ် ကမ်းခြေစောင့်တပ်ဗိုလ်ချုပ်ကြီးအာတီမီယိုအမ်အာဗူက အဆိုပါဖြစ်ရပ်သည် ဘာဂျိုဒီမာဆင်လော့တွင် တရုတ်ရေယာဉ်နှင့်ပတ်သက်သော အနီးကပ်လေ့ကျင့်မှု ၄ ကြိမ်မြောက်ဖြစ်သည်ဟု ဆိုထားသည်။

ပြီးခဲ့သည့် မေလက တရုတ်ကမ်းခြေစောင့်တပ်ရေယဉ် (CCG) သည် ပထဆုံးအကြိမ်အဖြစ် အနီးကပ်လေ့ကျင့်မှု ပြုလုပ်ခဲ့ကြောင်း ဖိလစ်ပိုင်ကမ်းခြေစောင့်တပ်ရေယာဉ်က အစီရင်ခံခဲ့သည်။

ကမ်းခြေစောင့်တပ်ရေတပ်ဗိုလ်ချုပ်ကြီး အာဗူက ဖိလစ်ပိုင်သည် ပင်လယ်ပြင်ရှိ အန္တရာယ်ရှိသော အခြေအနေများကို အပြည့်အဝ သတိပြုမိသော်လည်း အဆိုပါလှုပ်ရှားမှုများသည် နိုင်ငံ၏ သီးသန့်စီးပွားရေးဇုန် (EEZ) တွင် နိုင်ငံ၏ ပိုင်ဆိုင်မှုများနှင့် တပ်ဖွဲ့များဖြန့်ကြက်မှုကို ရပ်တန့်နိုင်လိမ့်မည်မဟုတ်ကြောင်း ပြောကြားခဲ့သည်။