လက်နက်ကိုင် ပဋိပက္ခများ ချုပ်ငြိမ်းရေးသည် နိုင်ငံ တစ်နိုင်ငံအတွက် သေရေး၊ ရှင်ရေးတမျှ အရေးကြီးသည်ဟု ဆိုကာ တိုင်းပြည် တည်ငြိမ်ရေးအတွက် အစိုးရသစ်နှင့် လက်တွဲ လုပ်ဆောင်သွားမည်ဟု တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်က ဇန်နဝါရီ ၂၄ ရက်က ပြောဆိုလိုက်သည်။
တပ်မတော်သည် “ပါတီစုံ ဒီမိုကရေစီ လမ်းကြောင်းပေါ်တွင် မယိမ်းမယိုင် ခိုင်မာစွာ လျှောက်လှမ်းနိုင်ရန် ထိန်းသိမ်း လုပ်ဆောင်ခဲ့ကြောင်း၊ နောင်အစိုးရနှင့်လည်း တည်ငြိမ်အေးချမ်းရေး လုပ်ငန်းများ ဆက်လက် လုပ်ဆောင်သွားရမည်” ဟု နေပြည်တော် ဘုရင့်နောင် ရိပ်သာ ဧည့်ခန်းမဆောင်တွင် မြန်မာနိုင်ငံ သတင်းမီဒီယာကောင်စီနှင့် တွေ့ဆုံစဉ် ပြောခဲ့ခြင်းဖြစ်သည်။
အလားတူ “တိုင်းပြည် တည်ငြိမ်အေးချမ်းမှုနှင့် ဖွံ့ဖြိုးတိုးတက်မှုအတွက် လက်နက်ကိုင် ပဋိပက္ခများ ချုပ်ငြိမ်းရေးသည် သေရေးရှင်ရေးတမျှ မရှိမဖြစ်အရေးကြီး လိုအပ်ကြောင်း၊ ငြိမ်းချမ်းရေးဆွေးနွေးပွဲများ စတင်ချိန်မှ သတ်မှတ်ကာလအတွင်း လုပ်ငန်းစဉ်များ ပြီးပြတ်အောင် လုပ်ဆောင်ရမည်” ဟုလည်း ပြောဆိုခဲ့သည်။
မြန်မာနိုင်ငံ သတင်းမီဒီယာကောင်စီနှင့် တွေ့ဆုံရာတွင် မီဒီယာမှပေးသည့် သုတ၊ ရသများ ၊ သတင်းများသည် ပြည်သူများအတွက် များစွာ အထောက်အကူပြုကြောင်း၊ ပြည်သူများ စာဖတ်အားမကျအောင် စာပေဖွံ့ဖြိုးရေး လုပ်ငန်းများကို ဝိုင်းဝန်း လုပ်ဆောင်ပေးရမည်ဟုလည်း ပြောဆိုခဲ့သည်။
တွေ့ဆုံဆွေးနွေးပွဲသည် တပ်မတော်နှင့် သတင်းမီဒီယာများအကြား ကောင်းမွန်သည့် ဆက်ဆံရေး တိုးမြှင့်ဆောင်ရွက်ရေး၊ စာပေဖွံ့ဖြိုးရေးလုပ်ငန်းများ ပူးပေါင်းဆောင်ရွက်ရေး၊ တပ်မတော်ဆိုင်ရာ သတင်းရယူရေးကိစ္စရပ်များ ပိုမိုချောမွေ့ အဆင်ပြေစေရန် ရည်ရွယ် တွေ့ဆုံခဲ့ကြခြင်းဖြစ်သည်။
ဆွေးနွေးပွဲသို့ ဒုတိယတပ်မတော် ကာကွယ်ရေးဦးစီးချုပ် ဒုတိယဗိုလ်ချုပ်မှူးကြီး စိုးဝင်း၊ ညှိနှိုင်းကွပ်ကဲရေးမှူး (ကြည်း၊ရေ၊လေ) ပူးတွဲတာဝန် ကာကွယ်ရေးဦးစီးချုပ်(လေ) ဗိုလ်ချုပ်ကြီး ခင်အောင်မြင့်၊ ကာကွယ်ရေးဦးစီးချုပ်(ရေ) ဒုတိယဗိုလ်ချုပ်ကြီး တင်အောင်စန်းနှင့် ကာကွယ်ရေးဦးစီးချုပ်ရုံး(ကြည်း)မှ တပ်မတော်အရာရှိကြီးများ တက်ရောက်ကြပြီး မြန်မာနိုင်ငံ သတင်းမီဒီယာကောင်စီ ဥက္ကဋ္ဌ ဦးခင်မောင်လေး နှင့် ဒုတိယဥက္ကဋ္ဌ များဖြစ်ကြသည့် ဦးဖေမြင့်နှင့် ဒေါက်တာ မျိုးသန့်တင်၊ အတွင်းရေးမှူး ဦးသီဟစောတို့ တက်ရောက်ခဲ့ကြသည်။
