အာဖဂန်နစ္စတန်တွင် မကြာသေးခင်က တာလီဘန်တပ်မှူးများ အသတ်ခံရမှုဖြစ်စဉ်များ ဖြစ်ပေါ်ခဲ့ခြင်းကို တုံ့ပြန်သောအားဖြင့် ယခင်အစိုးရအရာရှိဟောင်းများနှင့်တက်ကြွလှုပ်ရှားသူများကို လက်တုံ့ပြန်သွားမည်ဟု ဟယ်လ်မန်းပြည်နယ်မှ တာလီဘန်အာဏာပိုင်တို့က ခြိမ်းခြောက်ထားကြောင်း လူ့အခွင့်အရေးစောင့်ကြည့်အဖွဲ့ (HRW) က မတ်လ ၂၂ ရက်တွင် ပြောသည်။
ဟယ်လ်မန်းပြည်နယ်ရှိ တာလီဘန်တို့သည် ထောက်လှမ်းစောင့်ကြည့်မှုများကိုအရှိန်မြှင့်လုပ်ဆောင်နေပြီး တာလီဘန်အရာရှိများအပေါ် နောက်ထပ် တိုက်ခိုက်မှုများကို တုံ့ပြန်သောအားဖြင့် လက်တုံ့ပြန် လုပ်ဆောင်ချက်များ လုပ်သွားမည်ဖြစ်ကြောင်း သတိပေးထားသည်။
တရားဥပဒေ စိုးမိုးအာဏာတည်စေရေး အစီအမံတစ်ခုအဖြစ် လုပ်ဆောင်သည့် တိုက်ခိုက်မှုများမှလွဲပြီး အရပ်သားပြည်သူများအပေါ် လက်တုံ့ပြန်သတ်ဖြတ်မှုများကို နိုင်ငံတကာဥပဒေက တားမြစ်ပိတ်ပင်ထားသည်။
“ဟယ်လ်မန်း ပြည်နယ်က တာလီဘန်ခေါင်းဆောင်တွေအနေနဲ့ ဥပဒေနဲ့ မညီတဲ့ ပြစ်ဒဏ်ပေးမှုဆိုင်ရာ ခြိမ်းခြောက်မှုတွေလုပ်ရင်း တိုက်ခိုက်မှုတွေကို မတုံ့ပြန်သင့်ပါဘူး” ဟု HRW ၏ အာရှဆိုင်ရာ တွဲဖက်ညွှန်ကြားရေးမှူး ပက်ထရစ်ရှာ ဂေါ့စ်မန်းက ပြောသည်။
“တာလီဘန်အာဏာပိုင်တွေအနေနဲ့ လက်တုံ့ပြန် တိုက်ခိုက်မှုတွေကို ကာကွယ်တားဆီးဖို့ လိုပါတယ်။ အမှုအခင်းတွေကို နည်းလမ်းကျတဲ့ ဥပဒေလုပ်ငန်းစဉ်တစ်ခုကနေတဆင့် ကိုင်တွယ်သွားရမှာဖြစ်ပါတယ်” ဟု ဂေါ့စ်မန်းက ပြောသည်။
ခရိုင်အဆင့်လယ်ဗယ်အာဏာပိုင်များသည် ယခင်အစိုးရအရာရှိဟောင်းများကို ပစ်မှတ်ထားရန်နှင့် လက်တုံ့ပြန်ရန် တောင်းဆိုနေခဲ့ကြကြောင်း ဟယ်လ်မန်းပြည်နယ် ဂျရက်ရှ်မြို့ရှိ တာလီဘန် ရဲတစ်ဦးက ဒေသခံများကို ပြောခဲ့သည်။
