ဟောင်ကောင်ကိုယ်ခံပညာဆရာတစ်ဦးနှင့်လက်ထောက်တို့သည် ဒူးလေး၊ လေသေနတ်နှင့် ကိုယ်ခံပညာတို့ဖြင့် အသင့်ပြင်ကာ အစိုးရကို ဖြုတ်ချပြီး လွတ်လပ်သောနိုင်ငံ ထူထောင်ရန် လျှို့ဝှက်တပ်ဖွဲ့ကို လေ့ကျင့်ပေးနေသည်ဟုစွပ်စွဲခံထားရကာ သွေးထိုးလှုံ့ဆော်မှုဖြင့် ရဲတပ်ဖွဲ့က ၎င်းတို့အား တရားစွဲဆိုထားသည်။
အသက် ၅၉ နှစ်အရွယ် နည်းပြနှင့် အသက် ၆၂ နှစ်အရွယ် လက်ထောက်နည်းပြတို့သည် အစိုးရကိုမုန်းတီးရေး လှုံ့ဆော်ရန်နှင့် ဟောင်ကောင်လွတ်လပ်ရေးအတွက် လက်နက်ကိုင်တပ်ဖွဲ့ကို လေ့ကျင့်ရန် ကိုယ်ခံပညာလေ့ကျင့်ရေးစင်တာတစ်ခု ထူထောင်ခဲ့သည်ဟု စွပ်စွဲခံထားရသည်။ အသက် ၅၉ နှစ်ရှိပြီဖြစ်သည့် ဝေါင်တက်ခွန်သည် ကိုလိုနီခေတ် သွေးထိုးလှုံ့ဆော်မှုဥပဒေအရ တရားစွဲဆိုခံရခြင်းဖြစ်ပြီး အဆိုပါဥပဒေကို ရဲတပ်ဖွဲ့က ချောင်ထိုးထားသည်မှာ ကြာပြီဖြစ်ကာ အာဏာရ တရုတ်ကွန်မြူနစ်ပါတီ (CCP) က ၂၀၂၀ ခုနှစ် ဇူလိုင် ၁ ရက်မှစ၍ ပြင်းထန်လှသော အမျိုးသားလုံးခြုံရေးဥပဒေကို ပြဋ္ဌာန်းပြီးနောက် နိုင်ငံတော်လုံခြုံရေးကိစ္စများတွင် အသုံးပြုလာခဲ့သည်။
ဝေါင်အား သွေးထိုးလှုံ့ဆော်ရန်ရည်ရွယ်လုပ်ဆောင်မှုနှင့် လိုင်စင်မဲ့သေနတ်ကိုင်ဆောင်မှုတို့ဖြင့် စွဲချက် ၅ ချက်ဖြင့် တရားစွဲဆိုထားသလို ၎င်း၏ လက်ထောက် ချောင်မန်ချီ (၆၁နှစ်)သည် လက်နက်ဆိုင်ရာ စွဲချက်များနှင့်သာ တရားစွဲဆိုခံထားရသည်။ ၎င်းတို့နှစ်ဦးစလုံးကို အနောက်ကောင်လွန်းတရားရုံးတွင် မတ်လ ၂၂ ရက်က ရုံးထုတ်ခဲ့သော်လည်း အယူခံဝင်ခဲ့ခြင်း မရှိပေ။
အမျိုးသားလုံခြုံရေးတရားသူကြီးက အဆိုပါအမှုကို ကြားနာမည်ဖြစ်ပြီး ရဲတပ်ဖွဲ့က ဆက်လက်စုံစမ်းစစ်ဆေးရန် မေလ ၁၉ ရက်အထိ ရွှေ့ဆိုင်းထားပြီး နှစ်ဦးစလုံးကို အာမခံ မပေးပေ။
