မတ်လ ၁၄ ရက်
ရွှေနှင့် ဒေါ်လာများကို ဦးဖြိုးမင်းသိန်းက ပေးအပ်ခဲ့ခြင်းမရှိသလို ၎င်းအနေဖြင့် လက်ခံရယူခဲ့ခြင်းလည်းမရှိကြောင်း နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ယနေ့ရုံးချိန်းတွင် ထွက်ဆိုခဲ့ကြောင်း တရားရုံးအသိုင်းအဝိုင်းနှင့် နီးစပ်သူထံမှ သိရသည်။
ယနေ့ မတ်လ ၁၄ရက်ရုံးချိန်းတွင် အဆိုပါ အမှုနှင့် ပတ်သက်ပြီး နိုင်ငံတော်အတိုင်ပင်ခံပုဂ္ဂိုလ်ကို အဓိကစစ်မေးမှုပြုလုပ်ခဲ့ရာ အတိုင်ပင်ခံပုဂ္ဂိုလ်က ၎င်းအနေဖြင့် အပြစ်မရှိကြောင်း ထွက်ဆိုခဲ့သည်ဟုလည်း သိရသည်။
၎င်းက ခံပြသက်သေတင်သွင်းခြင်းမပြုသည့်အတွက် နောက်ရုံးချိန်းတွင် အမှုနှင့်ပတ်သက်ပြီး နှစ်ဖက်ရှေ့နေများက အပြီးသတ်လျှောက်လဲချက်ပေးကြရမည်ဖြစ်သည်။
ယင်းအမှုမှာ ရန်ကုန်တိုင်းဝန်ကြီးချုပ် ဦးဖြိုးမင်းသိန်းက ဒေါ်အောင်ဆန်းစုကြည်ကို အမေရိကန်ဒေါ်လာ ခြောက်သိန်းနှင့် အကယ်ဒမီအခေါက်ရွှေ ခုနစ်ပိဿာပေးခဲ့သည်ဟု စွပ်စွဲပြီး အဂတိအမှုဖြင့် တရားစွဲထားခြင်းဖြစ်သည်။
အမှုနှင့် ပတ်သက်ပြီး အတိုင်ပင်ခံပုဂ္ဂိုလ်ဘက်က ဦးဖြိုးမင်းသိန်းနှင့် ၎င်း၏ဇနီးအပါအဝင် ပြန်ခေါ်သက်သေ လေးဦးကို ခေါ်ယူခဲ့ပြီး အဆိုပါ ပြန်ခေါ်သက်သေ များကို မတ်လ ၇ရက်နေ့ ရုံးချိန်းတွင် ပြန်လည်စစ်ဆေးခဲ့သည်။
ရွှေနှင့်ဒေါ်လာများ ဒေါ်အောင်ဆန်းစုကြည်ထံ ပေးခဲ့ကြောင်း ဦးဖြိုးမင်းသိန်းက ပြီးခဲ့သည့် အောက်တိုဘာ ၁ရက်နေ့ရုံးချိန်းတွင် လိုပြသက်သေအဖြစ် ထွက်ဆိုခဲ့ပြီး ၎င်း၏ထွက်ဆိုချက်မှာ "အဓိပ္ပါယ်မဲ့"ကြောင်း ဒေါ်အောင်ဆန်းစုကြည်က "All Absurd"ဟု မှတ်ချက်ပေးထားသည်။
ထို့အပြင် တရားလိုဖြစ်သူ အဂတိလိုက်စားမှုတိုက်ဖျက်ရေးကော်မရှင်မှ ညွှန်မှူး ဦးရဲထက်ကို စတင်စစ်မေးခဲ့စဥ်က သက်သေခံပစ္စည်းဖြစ်သည့် ရွှေနှင့်ဒေါ်လာများကို ဒေါ်အောင်ဆန်းစုကြည်ထံက သိမ်းဆည်းရမိခြင်းမရှိဟု ထွက်ဆိုထားကြောင်း သိရသည်။
