မတ် ၅
မကွေးတိုင်း၊ လောင်းရှည်မြို့မှ ဆောမြို့သို့ တက်လာသော ကား ၁၆ စီးပါ စစ်ကောင်စီ ယာဉ်တန်းကို ပစ်ခတ် တိုက်ခိုက်ခဲ့ကြောင်း လောင်းရှည် ပြည်သူ့ကာကွယ်ရေး တပ်ဖွဲ့ ပြန်ကြားရေး တာဝန်ခံက ပြောသည်။
ယမန်နေ့ မတ်လ ၄ ရက် နံနက် ၉ နာရီတွင် တာဝေးပစ် လက်လုပ် သေနတ်ဖြင့် အဝေးမှ ပစ်ခတ် တိုက်ခိုက်ခြင်း ဖြစ်ပြီး အထိအခိုက်ကို သေချာ အတည် မပြုနိုင်ဟု ၎င်းက ဆိုသည်။
“ စစ်သားက ၂၀၀ နီးနီး ပါတယ်ဗျ ။ မိုင်းဆွဲမှာ ကြောက်လို့ ကားပေါ်ကနေ မလိုက်ကြဘူး။ လမ်းဘေးကို တပ်ဖြန့်ပြီး ရှေ့ပြေးထားတာဗျ။ ကားတွေက နောက်က လိုက်လာတာ” လောင်းရှည် ပြည်သူ့ ကာကွယ်ရေး တပ်ဖွဲ့ ပြန်ကြားရေး တာဝန်ခံက ပြောသည်။
မတ်လ ၃ ရက်နေ့ ကလည်း အဆိုပါ စစ်ကောင်စီ ယာဉ်တန်းနှင့် ထိတွေ့တိုက်ပွဲ ဖြစ်ပွားခဲ့ပြီး စစ်ကောင်စီ တပ်သား ၁၀ ဦးထက် မနည်း ပြင်းထန် ဒဏ်ရာ ရရှိခဲ့ကြောင်း ၎င်းက ပြောသည်။ လက်ရှိတွင် အဆိုပါ စစ်ကောင်စီ ယာဉ်တန်းသည် ဆောမြို့သို့ ရောက်ရှိနေသည်ဟု ဆိုသည်။
#MizzimaTV
#လောင်းရှည်မြို့နယ်
#ယာဉ်တန်း တိုက်ခိုက်ခံရ
