မတ်လ ၁ ရက်
COVID-19 ကြောင့် ယာယီပိတ်ထားသည့် ရန်ကုန်ဆေးရုံကြီးရှိ ဌာနအချို့ကို ပုံမှန် အချိန်ဇယားအတိုင်းပြန်လည်ဖွင့်လှစ်ပြီဖြစ်ကြောင်း မတ် ၁ရက် ည ၉ နာရီတွင် ရန်ကုန်ဆေးရုံကြီးမှ ထုတ်ပြန်ထားသည်။
ရန်ကုန်ဆေးရုံကြီးရှိ အထူးကုပြင်ပဌာန ခြောက်ခုကို ဖေဖော်ဝါရီ ၁၁ရက်နှင့် ၁၄ရက်မှ စတင်၍ ယာယီပိတ်သိမ်းထားခဲ့ခြင်း ဖြစ်ပြီး ယင်းကဲ့သို့ ပိတ်သိမ်းရခြင်းနှင့်ပတ်သက်၍ အထူးကုပြင်ပလူနာဌာနများမှ ဆရာဝန်ကြီးများ ဆရာမများနှင့် ကျန်းမာရေးဝန်ထမ်းများ COVID-19 ရောဂါခံစားနေရခြင်းကြောင့်ဟု ရန်ကုန်ဆေးရုံကြီးမှ လူမှုကွန်ရက်မှတဆင့် ထုတ်ပြန်ထားခဲ့ခြင်းဖြစ်သည်။
အဆိုပါ ယာယီပိတ်သိမ်းထားခဲ့သည့် ဌာနများမှာ နှလုံးဆေးကုဌာန၊ အကြောအဆစ်အထူးကုဌာန၊ ကင်ဆာဆေးဌာန၊ အထွေထွေအထူးကုသမားတော်ဌာန ၊ အစာအိမ်နှင့် အူလမ်းကြောင်းအထူးကုဌာနနှင့် ဟောမုန်းရောဂါအထူးကုဌာနတို့ ဖြစ်သည်။