ဖေဖော်ဝါရီ ၂၆
ဧရာဝတီတိုင်း၊ ပုသိမ်မြို့၊ ငဝန်ကျွန်းသာ (၄)လမ်းတွင် ယနေ့ ဖေဖော်ဝါရီ လ ၂၆ ရက်နေ့ မနက်ပိုင်းက နေအိမ်တစ်လုံး မီးလောင်မှုဖြစ်ပွားခဲ့ကြောင်း ဒေသခံများထံက သိရသည်။
ယနေ့ မနက် ၁၀ နာရီဝန်းကျင်အချိန်က စတင် လောင်ကျွမ်းခဲ့ခြင်း ဖြစ်ကြောင်း၊ မီးလောင်မှုဖြစ်ပွားခဲ့သည့် နေအိမ်၏ ဘေးအိမ်မှ အဝတ်ထွက်လှမ်းစဥ်အချိန်တွင် မီးလောင်မှုဖြစ်ပွားသည်ကိုတွေ့ရှိခဲ့ရခြင်းဖြစ်ကြောင်း ဒေသခံတစ်ဦးကပြောသည်။
"အဲ့ဒီအိမ်က အစ်မကြီးနဲ့ ကလေးတစ်ယောက်ကအပြင်သွားနေတဲ့အချိန်မှာ ဝါယာရှော့ဖြစ်ပြီးလောင်တာလို့ ယူဆရတယ်၊ လောင်တဲ့အချိန်မှာ အိမ်မှာခေါ်ထားတဲ့ ဝန်ထမ်းကောင်မလေးတစ်ယောက် အိမ်ထဲ ရှိနေတယ်လို့တော့ ကြားတယ်၊လူတွေထိခိုက်တာမျိုးတော့ မရှိဘူး"ဟု ဒေသခံကပြောသည်။
မီးလောင်မှုကြောင့် ပျက်စီးဆုံးရှုံးသည့်တန်ဖိုး ငွေကျပ် ၉ သိန်းရှိကြောင်း တိုင်းမီးသတ်ဦးစီး ဌာနထံမှ သိရသည်။
မီးလောင်မှုဖြစ်ပွားခဲ့သည့်နေအိမ်သည် တိုက်နှစ်လုံးကြားတွင်ရှိနေသည့် သစ်သားအိမ်တစ်လုံးဖြစ်သည့်အတွက် အဆိုပါနေအိမ် တစ်လုံးသာ ပျက်စီးသွားခဲ့ကြောင်း၊ လူမှုကူညီရေးအသင်း ရေကားများနှင့် မီးသတ်တပ်ဖွဲ့များက ဝိုင်းဝန်းမီးငြိမ်းသတ်ခဲ့ကြောင်း ဒေသခံကဆိုသည်။
အဆိုပါ မီးလောင်မှုဖြစ်ပွါးခြင်းကြောင့် ပုသိမ်မြို့မရဲစခန်းမှ ပုဒ်မ ၂၈၅ ဖြင့် အမှုဖွင့်အရေးယူနိုင်ရေး ဆောင်ရွက်လျက်ရှိကြောင်း ဧရာဝတီတိုင်း မီးသတ်ဦးစီးဌာနမှ တာဝန်ရှိသူတစ်ဦးကပြောသည်။
