ပင်တဂွန်၊ ဇွန် ၂ ။ ။ ပင်လယ်နက်အတွင်းတွင် ပြီးခဲ့သည့်ရက်များအတွင်းက အမေရိကန် ဖျက်သင်္ဘောတစ်စင်း ခုတ်မောင်းနေရာသို့ ရုရှစစ်လေယာဉ်များ ဖြတ်ကျော်ပျံသန်းလာခဲ့ကြောင်း ပင်တဂွန်က ပြောသည်။
အမေရိကန် ဖျက်သင်္ဘော USS Ross က ကျုးကျော်ရန်လိုသည့် အပြုအမူများရှိခဲ့သည်ဟု ရုရှနိုင်ငံပိုင်မီဒီယာက သတင်းထုတ်ပြန်သည်။
သို့သော်လည်း သင်္ဘောသည် နိုင်ငံတကာ ရေပိုင်နက်အတွင်းမှာပင် အချိန်ပြည့် ကောင်းမွန်စွာ ခုတ်မောင်းနေခဲ့ခြင်းဖြစ်ပြီး ပုံမှန်အော်ပရေးရှင်းကိုသာ ဆောင်ရွက်ခဲ့ခြင်းဖြစ်ကြောင်း အမေရိကန် ကာကွယ်ရေးဝန်ကြီးဌာနက ပြောသည်။
သင်္ဘောနှင့် မီတာ ၅၀၀ အနီးထိ ရုရှစစ်လေယာဉ်တစ်စင်း ဖြတ်ပျံသန်းသွားခဲ့သည့် ဗီဒီယိုကို လည်း အမေရိကန်ရေတပ်က ထုတ်လွှင့်ခဲ့သည်။
” ဒီသင်္ဘောက မလိုလားဖွယ် ကျုးကျော်တဲ့ အပြုအမူများ လုပ်ဆောင်ခဲ့တာပါ။ ပင်လယ်နက် ရေတပ်အုပ်စု သင်္ဘောများနဲ့ စောင့်ကြည့်ရေး အော်ပရေတာများအတွက် ဒီသင်္ဘောက စိုးရိမ် ထိတ်လန့်စရာ ဖြစ်ခဲ့ရတာပါ။ ဒါကြောင့် ကာကွယ်တားဆီးရေး လုပ်ဆောင်တဲ့အနေနဲ့ စစ်လေယာဉ် တွေကို စေလွှတ်ခဲ့ရတာပဲဖြစ်တယ်”ဟု ရုရှနိုင်ငံပိုင်မီဒီယာက စစ်တပ် သတင်းရင်းမြစ် တစ်ရပ်၏ ပြောကြားချက်ကို ကိုးကားဖော်ပြခဲ့သည်။