ဖေဖော်ဝါရီလ ၆ ရက်
ရန်ကုန်တိုင်း၊ တောင်ဒဂုံမြို့နယ် အမျိုးသားယဉ်ကျေးမှုနှင့် အနုပညာတက္ကသိုလ် အနီး ယနေ့ ဖေဖော်ဝါရီ ၆ ရက် ည ၇ နာရီ ၂ ဝမိနစ်ခန့်က ဗုံးပေါက်ကွဲမှု ဖြစ်ပွားခဲ့ကြောင်း ဒေသခံများ ပြောသည်။
"အသံကတော့ ကိုယ့်အိမ်ပေါ်ကို ကျလာသလိုကို ကြားရတာ။ အိမ်ပါ တုန်သွားတာ။ ဗုံးပေါက်သံတွေ ကြားဖူးသမျှထဲမှာ အခုတစ်ခေါက်ကတော့ အသံအကျယ်ဆုံး ကြားဖူးတာ'' ဟု ဒေသခံတစ်ဦးက ပြောသည်။
ဖေဖော်ဝါရီ ၂ ရက်ကလည်း အမျိုးသား ယဉ်ကျေးမှုနှင့် အနုပညာ တက္ကသိုလ်သို့ သေနတ်ဖြင့် လာရောက်ပစ်ခတ်မှု ဖြစ်ပွားခဲ့ပြီး လူထိခိုက်မှု မရှိခဲ့ကြောင်းနှင့် မပေါက်ကွဲသေးသည့် ဗုံးတစ်လုံး ရှာဖွေတွေ့ရှိခဲ့ကြောင်း သတင်းရင်းမြစ်တစ်ဦးက ပြောသည်။
" ကျောင်းထောင့်မှာ ကျွတ်ကျွတ်အိတ် အမည်းနဲ့ ဗုံးတွေ့တာ၊ ကျောင်းထောင့်ဆိုတာက လူသွားလူလာလည်း မရှိတဲ့နေရာပါ၊ သေနတ်နဲ့ လေးချက်လောက် ကျောင်းအပြင်ဘက်ကို ပစ်သွားတာ လူထိခိုက်မှု မရှိခဲ့ပါဘူး ''ဟု ၎င်းကပြောသည်။
လက်ရှိ အမျိုးသား ယဉ်ကျေးမှုနှင့် အနုပညာ တက္ကသိုလ် (ရန်ကုန်)တွင် တက်ရောက်သူများသည် ကျောင်းရှိ လူစာရင်း အချက်အလက်များ ထုတ်ဖော် ပြောဆိုခြင်းမပြုရန် ခံဝန် လက်မှတ်ထိုးရကြောင်း သိရသည်။
