ဇန်နဝါရီ ၂၃
စစ်ကိုင်းတိုင်း၊ ပုလဲမြို့နယ်၊ ဇီးဖြူကုန်းရွာမှ ပျူစောထီးများကို စစ်သင်တန်းပေးနေသည့် စခန်းတစ်ခုအား ပြည်သူ့ကာကွယ်ရေး ပူးပေါင်းတပ်ဖွဲ့များမှ ဝင်ရောက်တိုက်ခိုက်ရာ စစ်ကောင်စီတပ်သား နှစ်ဦး နှင့် ပျူစောထီးအဖွဲ့ဝင်ဆိုသူ သုံးဦး သေဆုံးကာ သုံးဦး ဒဏ်ရာရကြောင်း သိရသည်။
ယနေ့ ဇန်နဝါရီလ ၂၃ ရက်၊ နံနက် ၂ နာရီခန့်တွင် ပုလဲမြို့ တောင်ဘက် ကိုး မိုင်အကွာ ဇီးဖြူကုန်းရွာတွင် အင်အား ၃၀ ခန့်ဖြင့် စစ်သင်တန်းပေးနေသည့် ပျူစောထီးဆိုသူများ၏ စခန်းတစ်ခုအား ဝင်ရောက်တိုက်ခိုက်ခြင်းဖြစ်သည်။
“အဲ့ဒီရွာမှာက သုံးပုံတစ်ပုံလောက်က ပျူတွေဖြစ်တယ်ပေါ့။ သူတို့သင်တန်းပေးနေတာကို ကျွန်တော်တို့သတင်းသိရတယ်။ ဒါကြောင့် မနက်အစောပိုင်းမှာ အလစ်အငိုက် ဝင်တိုက်တာပါ ။ ရွာထဲကသတင်းပြန်ကြားရတဲ့အချက်အရ ကျဆုံးမှုကို ကျွန်တော်တို့ အတိအကျထုတ်ပြန်နိုင်တာပါ ”ဟု အောင်ဆန်းတပ်ဖွဲ့ ပြန်ကြားရေးတာဝန်ခံက ပြောသည်။
ယနေ့တိုက်ပွဲအား အောင်ဆန်းတပ်ဖွဲ့နှင့် ပုလဲမြို့နယ် ပြည်သူ့ကာကွယ်ရေးတပ်ဖွဲ့၏ မဟာမိတ်တပ်ပေါင်းစုမှ ပူးပေါင်းတိုက်ခိုက်ခြင်းဖြစ်ကြောင်း သိရသည်။
တိုက်ပွဲဖြစ်ပွားချိန် ၁၅ မိနစ်ခန့်ကြာမြင့်ခဲ့ပြီး ပြည်သူ့ကာကွယ်ရေး တပ်ပေါင်းစုဘက်မှ ရဲဘော်တစ်ဦး ဒဏ်ရာရခဲ့ကြောင်း သိရသည်။
ဒဏ်ရာရသည့် ရဲဘော်မှာ လက်လုပ်လက်နက်ပစ်ခတ်ရင်း ဒဏ်ရာရခဲ့ခြင်းသာဖြစ်ကြောင်း မစိုးရိမ်ရကြောင်း အောင်ဆန်းတပ်ဖွဲ့ပြန်ကြားရေးတာဝန်ခံက ပြောသည်။
