ဇန်နဝါရီ ၂၀

၂၀၁၇ ခုနှစ်၌ ရိုဟင်ဂျာများအပေါ် နယ်မြေရှင်းလင်းမှုနှင့် ပတ်သက်ပြီး မြန်မာနိုင်ငံအား ဂမ်ဘီယာနိုင်ငံက လူမျိုးတုံးသတ်ဖြတ်မှုဖြင့် တရားစွဲဆိုထားခြင်းအပေါ် မြန်မာစစ်ကောင်စီ၏ ထုချေချက်ကို လာမည့်လတွင် နိုင်ငံတကာ တရားရုံး ICJ က လာမည့်တွင် ကြားနာသွားမည်ဖြစ်ကြောင်း သိရသည်။ 

ICJ ရုံးစိုက်ရာ သည်ဟိတ်ရှိ ငြိမ်းချမ်းရေးနန်းတော်တွင် ဖေဖော်ဝါရီ ၂၁ ရက် တနင်္လာနေ့မှ ဖေဖော်ဝါရီ ၂၈ ရက် တနင်္လာနေ့အထိ မြန်မာဖက်က ထုချေချက်ကို ကြားနာသွားမည်ဖြစ်ကြောင်း ICJ က ဇန်နဝါရီ ၁၉ ရက်တွင် ထုတ်ပြန်ခြင်း ဖြစ်သည်။ 

ထိုသို့ ကြားနာရာတွင် COVID-19 ကပ်ဘေးကြောင့် ကြားနာမှုအား အွန်လိုင်းဗီဒီယိုနှင့် မြေပြင်တရားခွင်တို့မှ နှစ်မျိုးစုံ ကြားနာသွားမည်ဖြစ်သည်ဟု ICJ က ဆိုသည်။ 

မြန်မာစစ်ကောင်စီနှင့် ဂမ်ဘီယာတို့မှ ကိုယ်စားလှယ်များအနေဖြင့် အွန်လိုင်းမှဖြစ်စေ၊ တရားခွင်သို့ ကိုယ်တိုင်ဖြစ်စေ တက်ရောက်ရမည် ဖြစ်သည်။ 

၂၀၁၇ ခုနှစ်က ရခိုင်ပြည်နယ်တွင် ARSA အဖွဲ့၏ ရဲစခန်းများအား တိုက်ခိုက်မှုကို စစ်တပ်က တုံ့ပြန်ကာ နယ်မြေရှင်းလင်းရေးများ စစ်ဆင်မှုအတွင်း ဘင်္ဂလားဒေ့ရှ်နိုင်ငံဖက်သို့ ထွက်ပြေးတိမ်းရှောင်သူပေါင်း ခုနစ်သိန်းကျော်ထက်မနည်း ရှိခဲ့သည်။